Një vendim i rëndësishëm gjyqësor në Shtetet e Bashkuara i ka dhënë një fitore të madhe kompanisë Meta, pasi Gjykata Federale vendosi se blerjet e Instagram dhe WhatsApp nuk kanë shkelur ligjin amerikan të konkurrencës. Gjykatësi James E. Boasberg i Gjykatës së Qarkut në Distriktin e Kolumbisë deklaroi se Komisioni Federal i Tregtisë (FTC) nuk arriti të provonte se Meta kishte krijuar një monopol përmes blerjes së dy aplikacioneve të njohura, duke rrëzuar pretendimin se kompania kishte ndjekur një strategji “bliji ose zhyti” për të shuar konkurrencën e re.
Vendimi vjen pas një procesi gjyqësor të gjatë, ku gjatë gjashtë javëve u dëgjuan 38 dëshmitarë, përfshirë vetë CEO-n e Metas, Mark Zuckerberg. FTC u përpoq të argumentonte se Meta kishte monopolizuar tregun e rrjeteve sociale personale, një segment ku sipas agjencisë konkurrenca kryesore ishte Snapchat, ndërsa platforma të tjera si YouTube dhe TikTok nuk duhet të llogariteshin si rivalë të drejtpërdrejtë. Por gjykatësi Boasberg theksoi në vendimin prej 89 faqesh se agjencia nuk arriti të paraqiste prova të mjaftueshme për të mbështetur këtë definicion të ngushtë të tregut, duke e cilësuar argumentin e FTC-sё të paplotë dhe të padestinuar të qëndrojë juridikisht.
Meta e përshëndeti vendimin, duke e quajtur një njohje të konkurrencës së ashpër me tё cilёn kompania përballet nga platformat e tjera, sidomos në fushën e videove të shkurtra ku TikTok dhe YouTube konsiderohen rivalët kryesorë. Nga ana tjetër, përfaqësues të FTC shprehën zhgënjim të thellë dhe kritikuan gjykatësin duke e akuzuar për paragjykim kundër padive të iniciuara gjatë administratës së Donald Trump.
Procesi konsiderohet një moment kyç për përpjekjet e qeverisë amerikane për të kufizuar pushtetin në rritje të kompanive teknologjike. Ndërsa në raste të tjera shteti ka pasur fitore, si në dy paditë kundër Google, apo çështjet në vazhdim ndaj Amazon dhe Apple, kjo humbje e FTC-sё nënvizon vështirësinë tё provuarit të pasojave të blerjeve të vjetra në një treg ku balanca e konkurrencës ndryshon vazhdimisht dhe ku fusha e inteligjencës artificiale po hap një epokë të re sfidash.
Vendimi i tanishëm i hap rrugën Metas të vazhdojë ambiciet e saj të zhvillimit, përfshirë investimet në teknologjitë e inteligjencës artificiale dhe zgjerimin e platformave të saj.
Ndërkohë, debati për kufijtë e pushtetit të gjigantëve teknologjikë mbetet i hapur dhe pritet të vazhdojë të dominojë axhendën juridike dhe politike të viteve të ardhshme.
(Burimi: The New York Times)
