Një tërmet i fortë me magnitudë 7.6 ka goditur bregdetin verilindor të Japonisë, duke shkaktuar panik, evakuime masive dhe paralajmërime për cunami. Dridhja e fuqishme u regjistrua rreth orës 23:15 me orën lokale (14:15 GMT), në një thellësi prej 50 kilometrash dhe rreth 80 kilometra larg bregut të rajonit Aomori, njoftoi Agjencia Meteorologjike e Japonisë.
Menjëherë pas lëkundjes, autoritetet lëshuan paralajmërime për cunami, teksa u raportuan valë deri në 70 centimetra. Paralajmërimet janë hequr më pas, por zona mbetet nën vëzhgim të rreptë për dridhje pasuese.
Kryeministrja e Japonisë, Sanae Takaichi, konfirmoi se të paktën shtatë persona janë plagosur dhe i bëri thirrje qytetarëve të qëndrojnë vigjilentë gjatë ditëve në vijim. “Rishikoni përgatitjet tuaja të përditshme për tërmetet — siguroni mobiljet dhe jini të gatshëm të evakuoheni menjëherë nëse ndjeni dridhje të reja,” theksoi ajo.
Sipas Reuters, urdhra evakuimi janë lëshuar për rreth 90,000 banorë në zonat e prekura. Qeveria ngriti menjëherë një qendër urgjence pranë zyrës së kryeministrit, ndërsa ekipet e shpëtimit janë aktivizuar në disa rajone.
Sekretari i përgjithshëm i kabinetit, Minoru Kihara, deklaroi: “Po bëjmë çmos për të vlerësuar dëmet dhe për të koordinuar operacionet e shpëtimit dhe ndihmës.”
Shërbimet e trenave të shpejtë përgjatë bregut verilindor u pezulluan për arsye sigurie. Ndërkohë, kompania Tohoku Electric Power njoftoi se nuk ka probleme në termocentralet bërthamore Higashidori dhe Onagawa. Edhe autoritetet e centralit të Fukushimës — i dëmtuar rëndë në katastrofën e vitit 2011 — konfirmuan se nuk janë raportuar parregullsi.
Stacionet televizive japoneze ndërprenë transmetimet për të lëshuar paralajmërime urgjente: “Tsunami! Ikni menjëherë!” dhe “Paralajmërim cunami për bregdetin qendror të Paqësorit të Hokkaidos”.
Japonia, e vendosur në një nga zonat më aktive sizmike të planetit, përjeton një tërmet pothuajse çdo pesë minuta. Por kujtimi i 11 marsit 2011 mbetet ende i freskët — kur një tërmet 9.0 ballë dhe cunami shkatërruan Honshu-në, duke marrë mbi 18,000 jetë dhe duke shkaktuar krizën bërthamore në Fukushima.
Autoritetet paralajmërojnë se rreziku nuk ka kaluar dhe dridhjet pasuese mund të vazhdojnë për të paktën një javë.
(Burime: Reuters, BBC)
