Bumi i inteligjencës artificiale i ka shndërruar në miliarderë të profilit të lartë ata që janë pionerët e teknologjisë AI.
Një grup miliarderësh të rinj u krijuan nga startup-e të vogla. Këta pionerë do jenë rivalët apo “pushtuesit” e fuqishëm të Silicon Valley në të ardhmen.
Rrugëtimi i Elon Musk drejt miliardit të parë zgjati me vite pune dhe dështimesh derisa ia arriti qëllimit. Në fillim ai bë milioner kur një nga sipërmarrjet e tij të hershme iu shit eBay-it në vitin 2002. Pas shumë viteve pune dhe shpikjesh, “manjaku” i teknologjisë krijoi makinat elektrike Tesla dhe themeloi njëkohësisht kompaninë e raketave të hapësirës, SpaceX.
Në të kundërt, sot, shumica e miliarderëve të rinj të inteligjencës artificiale, janë bërë të tillë pa shumë “mund”, sapo themeluan kompanitë e tyre.
Kompanitë shumëmiliardëshe u krijuan diku rreth tre vjet më parë pasi OpenAI krijoi dhe shpërndau në gjithë botën ChatGPT. Kërkesat e investitorëve të mëdhenj u rritën menjëherë ndaj këtij produkti mahnitës, duke mbivlerësuar me shpejtësi aksionet e kompanive të reja të AI-së.
Mira Murati, 37-vjeçarja me origjinë nga Shqipëria (Vlora), një ish-drejtoreshë ekzekutive në OpenAI, njoftoi startup-in e saj të inteligjencës artificiale, Thinking Machines Lab, vetëm në shkurt të 2025. Deri në qershor, startup-i kishte arritur një vlerësim prej 10 miliardë dollarësh pa lançuar asnjë produkt të vetëm. Që prej krijimit të tij, start-upi i Mira Muratit ka lançuar vetëm një produkt të AI-së, por miliardat e shqiptares janë futur në llogarinë e saj.
Edhe kolegu i saj Ilya Sutskever, vetëm 39 vjeç, u bë miliarder. Sutskever, një tjetër ish-drejtor i lartë i OpenAI, lançoi Safe Superintelligence në qershor 2024. Kompania e tij, pa prodhuar asnjë produkt, u vlerësua 32 miliardë dollarë pasi mblodhi 2 miliardë vetëm për 2025, kjo, sipas PitchBook.
Brett Adcock, 39 vjeç, drejtori ekzekutiv i Figure AI, e themeloi kompaninë e tij në vitin 2022. Pasuria e tij neto është 19.5 miliardë dollarë.
Aravind Srinivas, 31 vjeç, drejtori ekzekutiv i Perplexity, gjithashtu krijoi kompaninë e tij në vitin 2022. Ajo vlerësohet në rreth 20 miliardë dollarë, sipas PitchBook.
Të gjithë miliarderët e rinj, përfshirë ‘vlonjaten’ Murati, kanë vlera marramendëse në aksionet e kompanive që kanë krijuar shumë pak kohë më parë.
Megjithatë, risku i dështimit ashtu si ai i suksesit të shpejtë, mbetet aty dhe i lartë për të gjithë këta inovatorë të së ardhmes së teknologjisë.
Në ‘botën’ e skeptikëve të AI dhe Silicon Valley, po qarkullon një pyetje: A do t’i mbijetojnë kohës këto kompani? Dhe cilët nga këta themelues të AI-së do përfundojnë duke qenë miliarderë të vërtetë dhe jo vetëm miliarderë në letër?
