Konkursi ndërkombëtar i bukurisë Miss Univers 2025 është tronditur nga një seri akuzash të rënda për manipulim votash, fshehtësi dhe favorizime të paligjshme, duke kthyer një spektakël botëror bukurie në një skandal të madh publik. Çështja e këtij viti nuk ka më të bëjë me performancën në skenë të finalisteve, por me akuzat se konkursi është komprometuar rëndë nga interesa biznesi dhe vendime të paracaktuara.
Debati shpërtheu pas fitores së Miss Meksikës, Fátima Bosch, ndaj së cilës u hodhёn dyshime se rezultati ishte i programuar paraprakisht. Përplasja u ndez pasi një prej gjyqtarëve të konkursit, Omar Harfouch, dha dorëheqjen pak ditë para finales dhe publikoi një sërë pretendimesh në rrjetet sociale, duke thënë se 30 finaliste u zgjodhën paraprakisht në një “votim të fshehtë” nga persona që nuk ishin pjesë e jurisë zyrtare dhe se fitorja e Miss Meksikës ishte e vendosur më parë, e ndikuar nga lidhje të biznesit midis bashkëpronarit të konkursit dhe babait të saj. Organizata Miss Univers i ka mohuar akuzat, ndërsa presidenti i organizatës, Raúl Rocha Cantú, i ka cilësuar pretendimet si goditje të qëllimshme ndaj reputacionit të eventit.
Drama u thellua më tej të mërkurën, pasi Prokuroria e Përgjithshme e Meksikës njoftoi se Rocha Cantú po hetohet për lidhje të mundshme me një rrjet të krimit të organizuar të përfshirë në trafik droge, armësh dhe vjedhje karburanti. Përfaqësuesi ligjor i tij nuk komentoi mbi akuzat.
Pas zhvillimeve të fundit, Olivia Yacé nga Bregu i Fildishtë, një nga konkurrentet më të favorizuara nga publiku, hoqi dorë nga titulli i saj “Miss Universe Africa & Oceania”. Në deklaratën e saj ajo tha se dëshiron të mbetet besnike ndaj vlerave që përfaqëson, vendim që u interpretua gjerësisht si reagim ndaj dyshimeve për manipulim.
Konfliktet kishin nisur edhe para finales, kur një incident i transmetuar në rrjetet sociale tregoi një drejtor tajlandez të konkursit që qortonte publikisht Miss Meksikën duke shkaktuar një reagim të fortë dhe largimin e disa konkurrenteve nga salla.
Konkursi Miss Universe ka një histori të gjatë polemikash dhe ky skandal është vetëm më i fundit. Gjatë viteve të fundit, konkurset kombëtare të lidhura me Miss Universe janë përballur me akuza për diskriminim, ngacmime seksuale, ksenofobi dhe manipulim rezultatesh. Në vitin 2023, fituesja e “Miss USA” dhe “Miss Teen USA” dhanë dorëheqjen pas raportimeve për presion psikologjik dhe mungesë transparence.
Ndërkohë, interesi i publikut duket se është zhvendosur nga vetë spektakli tek skandalet që e rrethojnë. Finalja e këtij viti nuk u transmetua në televizionin amerikan në gjuhën angleze, por vetëm përmes platformave online dhe në spanjisht. Megjithatë, mbulimi mediatik për çështjet e korrupsionit dhe manipulimit ka arritur rekorde.
Organizata këmbëngul se Miss Universe është një biznes privat dhe se nuk financohet nga fondet publike, por kritikat vazhdojnë të shtohen teksa akuzat dhe hetimet marrin përmasa më serioze. Ndërkohë, imazhi i eventit është vënë në pikëpyetje, dhe shumëkush pyet nëse konkursi ka humbur tashmë legjitimitetin dhe besueshmërinë tek publiku.
