Hollywood-i i riktheu sytë nga e shkuara në ceremoninë e 32-të të çmimeve të aktorëve, e njohur prej tri dekadash si Screen Actors Guild Awards dhe që këtë vit u mbajt me emrin e ri The Actor Awards. Përveç ndryshimit të emërtimit, organizatorët sollën edhe një temë të qartë për tapetin e kuq: riimagjinimin e glamurit të viteve ’20 dhe ’30, epokës së Jazz-it dhe stilit Art Deco.
Në sallën Shrine Auditorium and Expo Hall në Los Anxhelos, yjet e kinemasë dhe televizionit u përballën me sfidën për të ndërthurur frymën e epokës së artë me trendet moderne si “method dressing” apo veshjet që theksojnë trupin. Rezultati ishte një paradë siluetash dramatike, dantellash, puplash, gurësh të qëndisur dhe referencash të qarta ndaj elegancës së dikurshme.
Një nga paraqitjet më të komentuara ishte ajo e Teyana Taylor. Aktorja u shfaq me një fustan pa rripa në nuanca gri argjendi nga Thom Browne, me një bust të pikturuar që imitonte trupin femëror dhe një fund të gjatë me temina, duke evokuar njëkohësisht formën e nudos klasike dhe shkëlqimin e fasadës së ndërtesës Chrysler në Nju Jork.
Sarah Pidgeon solli një frymë pranverore me një fustan Balenciaga me bel të ulët, ku palat e fundit krijonin efektin e një tulipani të çelur. Ndërkohë, Matty Matheson, i njohur nga “The Bear”, rikujtoi stilin grafik të kostumeve me vija të theksuara, në një paraqitje që shumëkush e krahasoi me personazhin Beetlejuice.
Emma Stone zgjodhi një qasje më të përmbajtur por po aq elegante, me një fustan metalik në nuancë livando nga Louis Vuitton, të kombinuar me një triko të së njëjtës ngjyrë – një kombinim që bashkoi komoditetin me shkëlqimin e tapetit të kuq.
Sheryl Lee Ralph tërhoqi vëmendjen me një fustan bardhë e zi nga Saiid Kobeisy, me motive që kujtonin bojën e përzier mbi letër mermeri. Connor Storrie, nga ana tjetër, e zëvendësoi këmishën klasike me një varëse diamanti Tiffany & Co., duke e kthyer në aksesor kryesor.
Megan Stalter u shfaq me një stil që ironizonte luksin italian: fustan me motive shtazore, syze të mëdha, peliçe dhe një cigare në buzë – një referencë që ajo vetë e përshkroi si një “Versace” jozyrtare. Chase Infiniti solli një homazh për Josephine Baker me një fustan të artë Louis Vuitton, të ngjitur pas trupit dhe të kompletuar me një aksesor koke.
Demi Moore u shfaq me një krijim dramatik nga Schiaparelli, ku një shpërthim tyli i bardhë në pjesën e pasme krijonte efektin e pendëve të strucit. Tyler, the Creator i mbeti besnik stilit të tij, me kostum me pantallona të shkurtra në ngjyrë bezhë dhe kapele karakteristike.
Odessa A’Zion kombinoi një kostum me thekë nga Giorgio Armani me një model flokësh që evokonte figurën mitologjike të Meduzës. Jenna Ortega zgjodhi një fustan të çarë me dantella nga Christian Cowan, me detaje të konsumuara që dukeshin si të gjetura në një papafingo të vjetër. Ndërsa Quinta Brunson u shfaq me një fustan bardhë e zi nga Gabriela Hearst me supe skulpturore, duke kujtuar një figurë shahu glamuroze.
Në një mbrëmje që ndërthuri nostalgjinë me risinë, tapeti i kuq dëshmoi se moda mbetet një formë transformimi – dhe se Hollywood-i di të rikthejë epokën e artë pa humbur shkëlqimin bashkëkohor.
(Burimi: NYT)
