Festa e fundvitit ështё moment gëzimi e takimesh me njerëzit e dashur, por gjithnjë e më shpesh po shoqërohet edhe me sjellje që i vënë në siklet mikpritёsit. Sipas ekspertëve të etikës dhe organizimit të eventeve, shumë njerëz po harrojnë rregullat bazë të të qёnurit një mysafir i mirë, një fenomen që, sipas tyre, lidhet edhe me ndryshimet sociale të pas-pandemisë.
Gazetarja amerikane Kristen Rogers rrëfen se këtë vit organizoi një festë me rreth 25 persona dhe u befasua kur vetëm një i ftuar ofroi të sillte diçka. Edhe pse ajo kishte përgatitur ushqim dhe pije të mjaftueshme, mungesa e këtij gjesti u perceptua si shenjë pakujdesie dhe mungese mirënjohjeje. Sjellje të tilla, si ardhja duarbosh, vonesat e gjata apo lënia e tavolinёs rrëmujë pas darke, mund të duken të vogla, por për mikpritësin ato shpesh përkthehen si mungesë respekti.
Ekspertja e eventeve Gina Jokilehto shpjegon se shoqëria ndodhet në një periudhë ku ndërgjegjësimi social ka rënë. Sipas saj, pandemia ndryshoi mënyrën se si njerëzit sillen në ambiente sociale dhe, kur këto rregulla nuk praktikohen për një kohë të gjatë, ato harrohen lehtësisht. Edhe Myka Meier, eksperte e etikës, thekson se ankesat e mikpritësve janë të përditshme dhe se shumica e problemeve burojnë nga mungesa e vëmendjes ndaj të tjerëve.
Të qёnurit një mysafir i mirë fillon shumë përpara festës. Përgjigjja në kohë ndaj ftesës është thelbësore, sepse i ndihmon organizatorët të planifikojnë ushqimin, pijet dhe hapësirën. Një “po” e vonuar mund të mos merret parasysh dhe kjo nuk duhet të shkaktojë pakënaqësi. Po aq e rëndësishme është edhe të pyesësh gjithmonë nëse duhet të sjellësh diçka. Edhe nëse përgjigjja është “jo”, për festa të veçanta si darka apo kremtime festash, një dhuratë e vogël simbolike për mikpritësin shihet si shenjë mirënjohjeje.
Sjellja gjatë festës ka po aq peshë. Të mbërrish në kohë konsiderohet respekt, megjithëse një vonesë e vogël prej disa minutash zakonisht tolerohet. Nga ana tjetër, të shfaqesh shumë herët ose shumë vonë pa njoftuar mund të krijojë stres për organizatorin. Respektimi i rregullave të shtëpisë, si heqja e këpucëve, ndalimi i duhanit apo kufizimet për mysafirë shtesë, është po aq e rёndёsishme.
Një nga problemet më të shpeshta në festat e fundvitit lidhet me konsumimin e alkoolit. Ekspertët këshillojnë vetëkontroll, pasi mysafirët që e teprojnë me pijen jo vetëm që vënë veten në siklet, por krijojnë edhe situata të pakëndshme për të tjerët. Të hash paraprakisht, të alternosh pijet me ujë dhe të mendosh për kthimin në shtëpi janë shenja përgjegjshmërie.
Sjelljet e tjera që shpesh bezdisin përfshijnë përdorimin e tepruar të telefonit, fotografimin e vazhdueshëm për rrjetet sociale dhe mungesën e vëmendjes ndaj njerëzve përreth. Festat janë për komunikim dhe lidhje njerëzore, jo për të qëndruar të zhytur në ekran. Po ashtu, temat e debatueshme dhe diskutimet e ndjeshme nuk janë të përshtatshme për ambiente festive me shoqëri të përzier.
Edhe momenti i largimit ka rëndësi. Qëndrimi i tepërt mund të lodhë mikpritësin, ndërsa largimi në kohë, shoqëruar me falënderime dhe komplimente të sinqerta, lë një përshtypje pozitive. Një mesazh falënderimi ditën pas festës, sado i thjeshtë, është një gjest që forcon marrëdhëniet dhe tregon vlerësim për përpjekjen e bërë.
Në fund, këto rregulla nuk kanë të bëjnë me formalitet apo presion social, por me respekt dhe empati. Mikpritësit investojnë kohë, para dhe energji për të krijuar një ambient të ngrohtë dhe mikpritës, dhe një mysafir i mirë është ai që e vlerëson këtë përpjekje. Të tregosh konsideratë nuk të kushton asgjë, por të siguron jo vetëm ftesa të tjera në të ardhmen, por edhe marrëdhënie më të shëndetshme shoqërore.
(Burimi: CNN)
