Situata me furnizimin me energji elektrike në Kosovë nuk është thjesht krizë teknike, por shantazh i pastër, thotë njohësi i sektorit të energjisë, Adhurim Haxhimusa. Sipas tij, disa persona po e shfrytëzojnë vakumin politik dhe paralizën institucionale për të krijuar pasiguri në furnizimin me rrymë.
Në emisionin “Interaktiv”, Haxhimusa e quajti gjendjen aktuale “papërgjegjësi të madhe”, duke e drejtuar gishtin kryesisht nga KEK-u dhe mënyra e menaxhimit të tij.
“Me kapacitetin gjenerues që ka, KEK-u duhet ta dijë përgjegjësinë për furnizim stabil me energji elektrike. Ajo që po ndodh është shantazh, sepse është pasojë e papërgjegjësisë së madhe institucionale,” deklaroi ai.
Sipas Haxhimusës, problemi buron nga një zinxhir institucionesh pa drejtim funksional:
KEK-u është pa drejtim të rregullt prej dy vitesh, KOSTT ka kaluar më shumë se një vit me drejtues tё komanduar, ZRRE është e cunguar në funksionalitet, parlamenti nuk është i konstituuar dhe qeveria vepron me kompetenca të kufizuara.
“Kemi një paralizë institucionale dhe dikush po e shfrytëzon këtë paralizë. Kjo është formë e shantazhit ndaj furnizimit stabil me energji,” theksoi ai.
Haxhimusa sqaroi edhe pozitën e vështirë të KESCO-s. Sipas tij, kompania furnizuese ka duart e lidhura: rritja e importit të energjisë do të sillte automatikisht rritje tarifash për qytetarët, gjë që autoritetet po përpiqen ta shmangin.
“Nëse importohet më shumë energji me çmime të larta, kjo reflektohet në tarifa më të larta për konsumatorët. Për ta shmangur rritjen e tarifave, ndodhin edhe ndërprerjet e energjisë. Edhe KESCO është e kufizuar në veprim,” shpjegoi ai.
Sipas Haxhimusës, ZRRE është institucioni i vetëm që ka rol mbikëqyrës të plotë, pasi çdo kilovat i prodhuar apo i importuar duhet të jetë i raportuar dhe i monitoruar prej saj.
Deklaratat e tij vijnë në një moment kur vendi po përballet me ndërprerje të herëpashershme të energjisё elektrike dhe me shqetësim të shtuar publik për stabilitetin energjetik.
(Burimi: KosovaNet)
