Nancy Pelosi, gruaja e parë dhe e vetme që ka shërbyer ndonjëherë si Kryetare e Dhomës së Përfaqësuesve të SHBA-së, dhe një nga figurat më të fuqishme të politikës demokrate për dekada me radhë, ka njoftuar se nuk do të rikandidojë për një mandat tjetër në Kongres.
“E kam dashur me gjithë zemër shërbimin si zëri juaj në Kongres dhe gjithmonë kam nderuar himnin e Shën Françeskut, ‘Zot, më bëj një instrument të paqes sate,’ himnin e qytetit tonë. Prandaj dua që ju, bashkëqytetarët e mi nga San Francisko, ta mësoni të parët: Nuk do të kandidoj përsëri për Kongres,” tha Pelosi, 85 vjeçe, të enjten në një video prekëse që ishte në thelb një letër dashurie për qytetin që ka përfaqësuar për gati katër dekada në Uashington.
“Me zemër plot mirënjohje, mezi pres vitin tim të fundit në shërbim si përfaqësuesja juaj krenare. Ndërsa ecim përpara, mesazhi im për qytetin që dua është ky: San Francisko, njoh fuqinë tënde. Ne kemi bërë histori. Kemi bërë përparim. Gjithmonë kemi qenë në pararojë – dhe duhet të vazhdojmë të jemi të tillë, duke marrë pjesë aktive në demokracinë tonë dhe duke mbrojtur idealet amerikane që i çmojmë kaq shumë.”
Ky njoftim i jep fund spekulimeve të ditëve të fundit se demokratja veterane do t’i jepte fund karrierës së saj 38-vjeçare në Kongres. Ishte gjerësisht e pritur që Pelosi të largohej pas këtij mandati, i pari në dekada që ajo e pёrmbushi si anëtare e thjeshtë e Dhomës.
Duke reflektuar mbi detyrat qё ka patur në Kapitol, ajo tha: “U them kolegëve të mi gjatë gjithë kohës – pavarësisht çfarë titulli më kanë dhënë: kryetare, lidere, ose ‘whip’ – nderi më i madh për mua ka qenë gjithmonë të qëndroj në sallën e Kongresit dhe të them: ‘Flas në emër të popullit të San Franciskos.’”
Pelosi u zgjodh për herë të parë në Kongres në vitin 1987 dhe bëri histori në vitin 2007 si gruaja e parë që mbajti postin e Kryetares. Ajo mbetet e vetmja grua që ka mbajtur ndonjëherë çekanin e kryetares, të cilin e fitoi pas zgjedhjeve të viteve 2006 dhe 2018. Edhe sot, dekada pas ngjitjes së saj në krye të demokratëve në Kongres, ajo mbetet një nga zërat më me ndikim të partisë.
Vendimin për t’u tërhequr e bëri publik dy ditë pas një prej fitoreve të saj më të mëdha politike të viteve të fundit: miratimit me shumicë dërrmuese të një nisme elektorale në Kaliforni që ridrejton hartën kongresionale të shtetit në favor të demokratëve, përpara zgjedhjeve të mesmandatit të vitit 2026. Pelosi kishte mbledhur personalisht dhjetëra milionë dollarë për këtë nismë.
Megjithëse ajo vetë nuk ishte në fletën e votimit të martën, kjo fitore u pa si një përmbyllje e përshtatshme e një karriere politike legjendare. Në vitet e fundit, si kryetare dhe më pas si anëtare e zakonshme, Pelosi u përqendrua në përballjen me Donald Trump dhe transformimin që ai i bëri Partisë Republikane.
E rritur në lagjen “Little Italy” të Baltimores, Pelosi u formua në korridoret e Kapitolit, ku babai i saj shërbente si kongresmen nga shteti i Marylandit. Vajza e një ish-kryebashkiaku dhe motra e një tjetri, ajo njihej për ashpërsinë dhe mjeshtërinë e saj negociuese – cilësi që shpesh i atribuoheshin edukimit të saj politik që në familje.
Pelosi mbajti një kontroll të hekurt mbi grupin demokrat në Kongres – rrallëherë humbiste një votim – dhe përdori taktika tradicionale për të ruajtur pushtetin, përfshirë përjashtimin e rivalëve nga komisionet e rëndësishme. Gjatë gjithë karrierës së saj si kryetare, ajo nuk u përball asnjëherë me një kundërshtar serioz.
Dy vjet pasi u tërhoq nga drejtimi i demokratëve në Kongres për t’u lënë vend brezave të rinj, ajo ende konsiderohet si një nga kryetaret më të fuqishme të historisë moderne. Gjatë mandatit të saj të dytë si kryetare, ajo drejtoi përplasjet historike me Donald Trump – përfshirë dy procese të rralla shkarkimi ndaj një presidenti amerikan. Një moment i paharrueshëm ishte kur ajo grisi kopjen e fjalimit të Trump-it për gjendjen e Unionit në vitin 2020, gjatë transmetimit direkt.
Armiqësia mes tyre arriti kulmin pas sulmit të 6 janarit 2021 ndaj Kapitolit, kur përkrahësit e Trump-it pushtuan ndërtesën, shkatërruan zyra dhe sulmuan stafin e Pelosit.
Trashëgimia e saj ligjvënëse, megjithatë, shkon shumë përtej epokës Trump. Në fjalimin e saj të parë si anëtare e re e Kongresit në fund të viteve 1980, ajo u përqendrua në luftën kundër epidemisë së HIV/AIDS. Në katër dekada shërbim, ajo votoi për çështje historike – si autorizimi i luftës në Irak (të cilin e kundërshtoi) apo procedurat e shkarkimit ndaj presidentit Bill Clinton (po ashtu kundërshtoi).
Pelosi fitoi për herë të parë çekanin e kryetares 18 vjet më parë dhe e rimori sërish në vitin 2019, duke u bërë personi i parë pas gjashtë dekadash që mbajti mandatin e dytë jo të njëpasnjëshëm si kryetare.
“Ky është një moment historik për Kongresin dhe për gratë e këtij vendi,” tha ajo në fjalimin e parë si kryetare në vitin 2007. “Është një moment që e kemi pritur për më shumë se 200 vjet.”
Gjatë udhëheqjes së saj, demokratët patën dy periudha të plotfuqishme në Uashington, me kontrollin e Kongresit, Senatit dhe Shtëpisë së Bardhë. Në ato vite, Pelosi, përkrah liderëve të Senatit Harry Reid dhe më pas Chuck Schumer, miratoi ligje madhore, përfshirë Aktin e Kujdesit të Përballueshëm (Obamacare), për të cilin ajo u cilësua si “arkitektja kryesore”.
Pelosi kishte një marrëdhënie të ngushtë me presidentin Joe Biden, me të cilin miratoi miliarda dollarë për rimëkëmbjen nga pandemia e Covid-19 dhe për zgjerimin e programeve shëndetësore. Megjithatë, ajo nuk e mbështeti publikisht kandidaturën e tij në muajt e fundit të fushatës dhe ishte ndër figurat e larta demokrate që privatisht e nxisnin të tërhiqej nga gara në verën e vitit 2024, duke shprehur dyshime për aftësinë e tij për të mposhtur Trumpin.
Në maj të vitit 2024, presidenti Biden i dha Pelosit Medaljen Presidenciale të Lirisë, nderimin më të lartë civil në Shtetet e Bashkuara.
Në gati katër dekada shërbim, Pelosi drejtoi demokratët përmes ndryshimeve të thella politike dhe polarizimit nё rritje, që kulmuan me shtimin e dhunës politike – përfshirë sulmin brutal ndaj bashkëshortit të saj, Paul Pelosi, në vitin 2022. Ai pësoi frakturë të kafkës dhe iu nënshtrua një periudhe të gjatë rikuperimi. Pelosi e pranoi se ky sulm ndikoi në vendimin e saj për t’u tërhequr.
(Burimi: CNN)
