Kryeministri britanik Keir Starmer ka dalë hapur në mbrojtje të NATO-s, duke theksuar se qëndrimi i Shteteve të Bashkuara në aleancë është në interesin e tyre strategjik, në një kohë kur tensionet globale janë rritur ndjeshëm për shkak të luftës në Iran.
Duke folur pas një turi diplomatik në vendet e Gjirit, ku diskutoi për armëpushimin dhe krizën në Ngushticën e Hormuzit, Starmer kundërshtoi drejtpërdrejt retorikën e Donald Trump, i cili ka kërcënuar disa herë me tërheqjen e SHBA-ve nga NATO për shkak të mungesës së mbështetjes evropiane në konflikt.
Starmer pranoi se Evropa duhet të bëjë më shumë për mbrojtjen, por theksoi se NATO mbetet “aleanca ushtarake më efektive që bota ka njohur ndonjëherë” dhe se ajo ka garantuar siguri për dekada me radhë. Sipas tij, një rol më i fortë evropian brenda NATO-s është i domosdoshëm, por kjo nuk e zbeh rëndësinë e angazhimit amerikan.
Komentet e tij vijnë në një moment kritik, ndërsa lufta në Lindjen e Mesme ka rritur presionin mbi aleancën transatlantike dhe ka thelluar ndarjet mes Uashingtonit dhe partnerëve evropianë. Shumë vende të NATO-s nuk mbështetën sulmet ndaj Iranit, çka ka nxitur reagime të ashpra nga Trump.
Një pjesë e rëndësishme e diskutimeve të Starmer me liderët e Gjirit dhe me vetë Trump u përqendrua te siguria e Ngushticës së Hormuzit.
Starmer paralajmëroi se armëpushimi aktual është i brishtë dhe kërkon më shumë angazhim ndërkombëtar, ndërsa theksoi se nuk duhet të lejohet vendosja e tarifave për kalimin e anijeve në këtë korridor strategjik.
Nga ana tjetër, ministri britanik i Mbrojtjes, John Healey, theksoi se roli i Britanisë në rajon flet më shumë se deklaratat politike. Edhe pse Londra nuk mori pjesë në sulmet ndaj Iranit, ajo kontribuoi në mbrojtjen e vendeve të Gjirit, duke rrëzuar dronë dhe raketa iraniane dhe duke vënë në dispozicion bazat e saj për operacionet amerikane.
Në sfond mbetet tensioni i vazhdueshëm me Donald Trump, i cili ka përdorur tone të ashpra ndaj aleatëve dhe madje ka kërcënuar Iranin me deklarata ekstreme, duke shtuar pasigurinë në skenën ndërkombëtare.
Por pёr Starmerin, pavarësisht mosmarrëveshjeve, NATO mbetet shtylla kryesore e sigurisë globale – dhe dobësimi i saj do të kishte pasoja për të gjithë.
(Burimi: The Guardian)
