Madonna dëshmon edhe një herë se mosha është vetëm numër. Ikona 67-vjeçare e muzikës pop është rikthyer në qendër të vëmendjes me një fushatë të re reklamuese për Dolce & Gabbana, ku shfaqet e guximshme, sensuale dhe plot vetëbesim — në një stil që rikujton dokumentarin e saj legjendar të vitit 1991, In Bed With Madonna.
Në pamjet e publikuara për parfumin “The One”, këngëtarja shfaqet e shtrirë në një shtrat luksoz, e veshur me tё brendshme elegante, duke pozuar përkrah modelёve meshkuj më të rinj. Estetika e reklamës luan me elementë klasikë të stilit të saj: dramatike, teatrale dhe provokuese, por gjithmonë me firmën artistike që e ka bërë ikonë globale.
Në një tjetër skenë, Madonna shihet duke pikturuar një model nudo, ndërsa në një moment tjetër shfaqet me sy të mbuluar, duke shtuar një dozë misterioze në konceptin vizual të fushatës. Fotot janë realizuar nga fotografi i njohur Mert Alas dhe po cilësohen si një rikthim i fortë i artistes në estetikën që dikur tronditi industrinë e showbiz-it.
Mbretëresha e Popit nuk ka fshehur kurrë lidhjet e saj me partnerë më të rinj ndër vite, dhe aktualisht është në një marrëdhënie me futbollistin 29-vjeçar Akeem Morris.
Paralelisht me projektin e modës, Madonna po përgatit rikthimin muzikor me albumin e shumëpritur Confessions On A Dancefloor 2, vazhdim i hitit të saj të vitit 2005.
Në një industri ku shumë yje tërhiqen me kalimin e viteve, Madonna vazhdon të sfidojë normat, të provokojë dhe të mbetet një simbol i lirisë artistike — tani, më shumë se kurrë.
(Burimi: The Sun)
