Në një vendim që prek drejtpërdrejt jetën personale dhe sigurinë e grave, guvernatori i shtetit amerikan të Missouri, Mike Kehoe, ka nënshkruar një projektligj të ri që u ndalon gjyqtarëve të vonojnë procedurat e divorcit për shkak të shtatzënisë së bashkëshortes.
Ligji i ri, i njohur si HB 1908, i jep fund një praktike që daton që nga vitet 1970, ku gjykatat kërkonin deklarimin e shtatzënisë dhe në shumë raste pezullonin finalizimin e divorcit. Në praktikë, kjo ka krijuar situata të vështira, sidomos për gratë që ndodhen në marrëdhënie abuzive dhe nuk mund të dalin ligjërisht prej tyre.
Nisma u mbështet fuqishëm nga ligjvënësja republikane Cecelie Williams, e cila e ka përjetuar vetë këtë situatë vite më parë, kur përpiqej të ndahej nga një bashkëshort abuziv ndërsa ishte shtatzënë. Sipas saj, ligji i vjetër ishte menduar fillimisht për të rregulluar çështje si kujdestaria dhe mbështetja për fëmijët, por në realitet shpesh i linte gratë të bllokuara në marrëdhënie të rrezikshme.
Me ndryshimin e ri, përcaktohet qartë se “statusi i shtatzënisë nuk e pengon gjykatën të marrë një vendim për zgjidhjen e martesës ose ndarjen ligjore”. Kjo do të thotë se procedurat e divorcit mund të vazhdojnë normalisht, pa u ndikuar nga gjendja e shtatzënisë.
Sipas organizatave që merren me shëndetin e nënave dhe foshnjave, dhuna në marrëdhënie shpesh përkeqësohet gjatë shtatzënisë, çka e bën këtë ndryshim edhe më të rëndësishëm nga pikëpamja sociale dhe ligjore.
Deri tani, Misuri ishte ndër disa shtete amerikane, së bashku me Texas, ku gjykatat kishin tendencë të ndalonin divorcet në raste të tilla. Me këtë ligj të ri, autoritetet synojnë të japin më shumë fleksibilitet dhe, mbi të gjitha, mbrojtje për individët që kërkojnë të largohen nga një martesë problematike.
Në të njëjtën ditë, guvernatori Kehoe nënshkroi edhe dy ligje të tjera që lidhen me sistemin penal të të miturve dhe dënimet për trafikimin seksual të fëmijëve, duke sinjalizuar një fokus më të gjerë në çështjet sociale dhe të drejtave të njeriut.
(Burimi: CNN)
