Ish-kreu i Kontrollit të Lartë të Shtetit dhe deputeti aktual i Partisë Demokratike, Bujar Leskaj, duket se ka ndërtuar një reputacion të veçantë në politikën shqiptare – atë të politikanit që i merr gjërat “me sportivitet”, qoftë në Kuvend, qoftë në lokal, e së fundi edhe në sheshe protestash.
Në vitin 2021, kryeministri Edi Rama publikoi një video që bëri xhiron e rrjeteve: Leskaj, i veshur me kanatjere dhe me shenja të qarta dehjeje, shihej duke bërë “mundje kokë-më-kokë” me një mik në një lokal të Vlorës. Aty pranë ndodheshin edhe ish-deputeti Sali Shehu dhe disa miq të tjerë që bënin rolin e “arbitrit” në një përballje që do të mbetej ikonike për mënyrën se si politika shqiptare shpesh ngatërrohet me folklorin e gotës. Rama e përdori videon për ta goditur publikisht Leskajn, duke e shfaqur si simbol të mungesës së seriozitetit në radhët e opozitës.
Një vit më pas, në 2022, sërish emri i Leskajt u lidh me episodet e alkoolit – këtë herë brenda në Kuvend. Ai dhe deputeti Edi Paloka u përjashtuan për 10 ditë nga seancat parlamentare pas akuzave të Partisë Socialiste se ishin “nën efektin e pijeve alkoolike” gjatë debatit për buxhetin e vitit 2023. Leskaj reagoi menjëherë me stilin e tij karakteristik: “Po për Ramën që kishte pirë drogë, do marrin masë?” – duke e kthyer incidentin në shkëmbim akuzash dhe thumbash politike.
E sot, në 2025, duket se historia përsëritet, vetëm se skena ka ndryshuar. Nga salla e Kuvendit dhe tavolina e lokalit, Bujar Leskaj është zhvendosur në Sheshin “Skënderbej”, mes flamujve të UÇK-së dhe thirrjeve “Lavdi”. Edhe kësaj here, s’ishte vetëm për t’u parë, por për t’u komentuar. Deputeti i PD-së vendosi të sfidojë urdhrin e Sali Berishës dhe t’i bashkohet protestës së veteranëve të luftës së Kosovës – një akt që mund të lexohej si guxim politik… nëse nuk do të shoqërohej me shenja të dukshme dehjeje. Pamjet e publikuara online treguan një Leskaj të paqartë në të folur dhe lëvizje, më shumë si pjesë e një feste sesa e një proteste.
Nga “mundjet” me miqtë në lokal, tek përplasjet në Kuvend dhe tani tek “lavditë” e shesheve, karriera e Bujar Leskajt duket si një lundrim nëpër… një det me “raki”. Dhe ndoshta, në fund të ditës, kjo është një histori më shumë për Shqipërinë sesa për vetë Leskajn – një vend ku politika gjithmonë gjen mënyra të reja për të u lëkundur mes seriozitetit dhe cirkut.
Në shesh, Leskaj ndoshta mendonte se po nderonte UÇK-në. Por për shumë nga ata që panë pamjet, ai e bëri të kundërtën: një kujtim heroik u shndërrua në një shfaqje komike, ku patriotizmi përzihej me avujt e pijeve.
Një gjë është e sigurt – nga KLSH-ja në UÇK, Bujar Leskaj mbetet po ai: një politikan që gjithmonë zgjedh gotën që avullon.
