Ju kujtohet çifti që u kap nga kamerat duke u përqafuar në koncertin e Coldplay dhe u përpoq të fshihej sapo u shfaq në ekranin gjigant? Videoja u bë virale brenda pak orësh, por për Kristin Cabot, gruaja në qendër të skandalit, pasojat ishin shkatërruese.
Drejtoresha e burimeve njerëzore, e cila u filmua duke përqafuar shefin e saj, Andy Byron, e ka përshkruar gjithë situatën si një “ferr të vërtetë”, duke thënë se ngacmimi dhe kërcënimet nuk pushuan kurrë pas momentit viral.
Kristin Cabot, 53 vjeçe, ka folur për herë të parë publikisht për incidentin, duke rrëfyer për New York Times se videoja i shkatërroi jetën personale dhe profesionale. Pas shpërthimit të skandalit, Andy Byron, atëherë drejtor ekzekutiv i kompanisë teknologjike Astronomer, u pezullua nga detyra dhe u hetua, përpara se të jepte dorëheqjen. Pak më pas, edhe Cabot u largua nga kompania.
Ajo tregon se po përpiqet të gjejë një punë të re, por i është thënë hapur se është “e papunësueshme”. Situata u përkeqësua edhe më shumë nga kërcënimet serioze që ajo thotë se ka marrë, përfshirë mesazhe nga persona që pretendonin se dinin vendndodhjen e saj. Njëri prej tyre i kishte shkruar: “Po vij për ty”.
“Fëmijët e mi kishin frikë se unë do të vdisja dhe se edhe ata do të vdisnin,” rrëfeu Cabot, duke shtuar se familja e saj filloi të shmangte daljet dhe hapësirat publike nga frika.
Sipas saj, ironikisht, kritikat më të ashpra vinin nga gratë. Ajo u përball me ngacmime ballë për ballë, telefonata dhe mesazhe të shumta, kryesisht nga gra. Të dhënat e saj personale u publikuan në internet, ndërsa për javë të tëra ajo merrte deri në 600 telefonata në ditë. Cabot thotë se ka marrë 50 deri në 60 kërcënime me vdekje, ndërsa paparacët ishin vazhdimisht jashtë shtëpisë së saj, si një “paradë e pafund”.
Megjithatë, ajo thotë se gradualisht po përpiqet të rimarrë kontrollin e jetës. Ka gjetur terapistë për fëmijët e saj dhe ka filluar të dalë nga shtëpia, madje të luajë tenis, si pjesë e rikthimit në normalitet.
Cabot dhe Byron mbajtën kontakt për një periudhë të shkurtër pas skandalit, duke shkëmbyer këshilla se si të përballonin krizën. Por ajo thotë se të dy vendosën të ndërprisnin çdo komunikim, pasi “kjo do ta bënte shumë të vështirë për të gjithë të ecnin përpara dhe të shëroheshin”.
Nga ana e tij, Andy Byron nuk ka folur publikisht. Pas koncertit, një deklaratë e rreme që pretendohej se ishte e tij, e shoqëruar me tekste këngësh të Coldplay, u bë virale, duke detyruar kompaninë Astronomer të reagojë zyrtarisht.
“Astronomer është i përkushtuar ndaj vlerave dhe kulturës që na kanë udhëhequr që nga themelimi,” thuhej në deklaratë, duke theksuar se udhëheqësit duhet të jenë shembull në sjellje dhe përgjegjësi. Pak më vonë, kompania konfirmoi se Andy Byron kishte dhënë dorëheqjen, e cila u pranua nga bordi drejtues.
(Burimi: BBC)
