Mehdi Mahmoudian, bashkëshkrimtari i nominuar për çmimin “Oscar” për filmin “It Was Just an Accident”, është liruar nga një burg iranian vetëm 17 ditë pas arrestimit të tij, sipas raportimeve të mediave lokale.
Mahmoudian u ndalua në Teheran menjëherë pasi nënshkroi një deklaratë që dënonte udhëheqësin suprem të Iranit, Ajatollah Ali Khamenei, si edhe shtypjen e dhunshme të demonstruesve nga regjimi. Të martën ai u lirua nga burgu Nowshahr së bashku me dy nënshkrues të tjerë të deklaratës, Vida Rabbani dhe Abdollah Momeni. Nuk u dhanë menjëherë detaje të mëtejshme mbi ndonjë akuzë konkrete ndaj tij, ndërsa të tre u liruan me kusht.
Mahmoudian është nominuar për skenarin më të mirë origjinal në çmimet e Akademisë bashkë me Nader Saeivar, Shadmehr Rastin dhe regjisorin e filmit, Jafar Panahi. Drama e hakmarrjes, e frymëzuar nga koha që vetë Panahi kaloi në burg, është nominuar gjithashtu për filmin më të mirë ndërkombëtar si propozim i Francës.
Në një deklaratë të martën, Panahi theksoi se “Mehdi Mahmoudian, Vida Rabbani dhe Abdollah Momeni ushtruan në mënyrë paqësore të drejtën e tyre për të shprehur pikëpamjet, por regjimi u përgjigj duke i akuzuar për ‘fyerje të udhëheqësit suprem’ dhe ‘propagandë kundër Republikës Islamike’”. Ai shtoi se për vite me radhë akuza të tilla janë përdorur për të kriminalizuar mendimin, për të heshtur kritikat dhe për të mbjellë frikë në shoqëri, duke e cilësuar shndërrimin e një akti civil në çështje sigurie kombëtare si një shenjë të qartë intolerance ndaj zërave të pavarur.
Mahmoudian, i njohur si shkrimtar dhe aktivist politik, është burgosur disa herë më parë, përfshirë një dënim pesëvjeçar që përfundoi në vitin 2014 me akuzën për “kryengritje kundër regjimit”. Ai dhe Panahi janë njohur pikërisht gjatë kohës që ndodheshin në burg, ndërsa vetë regjisori ka kaluar gjithashtu periudha burgimi dhe arresti shtëpiak nga autoritetet e Republikës Islamike.
Lirimi i tij vjen në një moment tensionesh të larta në Iran, ku mijëra persona u vranë gjatë protestave mbarëkombëtare të muajit të kaluar. Presioni ndërkombëtar ndaj regjimit është rritur ndjeshëm për shkak të shtypjes së demonstruesve, ndërsa fundjavën e kaluar u zhvillua edhe një protestë masive në Mynih.
Të premten, presidenti i SHBA-së, Donald Trump, deklaroi se ndryshimi i regjimit në Iran “do të ishte gjëja më e mirë që mund të ndodhte”.
Traileri i filmit “It Was Just an Accident”
(Burimi: The Guardian)
