Nga rrjetet sociale deri te pasarelat e modës së lartë, një frymë e re po formëson veshjen e meshkujve. Nuk është modë e zhurmshme dhe as nostalgji për të shkuarën. Është një stil i menduar, i përmbajtur dhe i qëllimshëm, që pasqyron mënyrën se si shumë të rinj duan të perceptohen sot: të rregullt, të vetëdijshëm dhe të sigurt në vetvete.
Mjafton të shohёsh tapetin e kuq të Golden Globes, ku aktorë të rinj sollёn veshjen formale me kreativitet të ri, ose panairin e famshëm Pitti Uomo në Firence, ku këtë vit u ftuan stilistё që sjellin kostume moderne, elegante, por pa ngurtësinë tradicionale. Kjo shënon një largim të qartë nga dominimi i gjatë i asaj qё e quajnё “veshja e rrugёs”, epoka e logove të mëdha, pantallonave sportive dhe atleteve. Tani vëmendja po kthehet te cilësia, qartësia e stilit dhe individualiteti.
Edhe tregu e reflekton këtë. Dyqanet që dikur shisnin veshje ekstreme nga markat më “trendy”, sot vërejnë se të njëjtët klientë po kërkojnë rroba më të qeta, më të rafinuara dhe më të pjekura. Parashikimet e platformave globale të modës flasin për një mashkull që ndërton garderobën me kujdes, jo për t’u dukur, por për të qenë.
Në qendër të këtij ndryshimi është një veshje e thjeshtë që u bë simbol: “quarter zip” – pulovra me zinxhir të shkurtër në jakë. Nga një element sportiv apo ushtarak, ajo është shndërruar në uniformën e re të djemve që duan të duken “profesionalë”, edhe kur janë ende studentë apo në fillimet e karrierës. Videot virale në TikTok, ku të rinj shfaqen me kёto pulovra duke folur për disiplinë dhe sukses, kanë miliona shikime. Dhe ata pёrcjellin mesazhin “kur e vesh, sillesh ndryshe”.
Ky trend nuk është vetëm estetik. Sociologët e modës thonë se në kohë pasigurie ekonomike dhe politike, njerëzit kërkojnë të projektojnë kontroll dhe qetësi. Të vishesh mirë bëhet një mënyrë për të treguar se “jam në rregull”, edhe kur realiteti është i paqëndrueshëm. Në të njëjtën kohë, kultura e vetë-përmirësimit në rrjete sociale e ka kthyer stilin në provë vizuale të disiplinës personale.
Pulovra me zinxhir nuk është e vetmja. Këpucët po zëvendësojnë atletet, kravatat po rikthehen si zgjedhje stili dhe jo detyrim, kostumet po bëhen më të buta dhe më të rehatshme. Formalja nuk refuzohet më, thjesht rishpiket.
Dhe megjithëse në rrjete sociale ka edhe ironi për “performancën e mashkullit modern”, realiteti është se veshja është bërë pjesë e mënyrës se si burrat e rinj negociojnë identitetin e tyre në publik.
Moda mashkullore e 2026 nuk bërtet. Ajo flet me zё të ulët: për cilësi, për kujdes, për personalitet. Dhe gjithçka, mesa duket, nisi nga një zinxhir i vogël në jakë.
(Burimi: CNN)
