Pas goditjes së rëndë që pësoi në ofensivën izraelite të vitit 2024 – ku u vra lideri i tij Hassan Nasrallah, disa komandantë të lartë dhe mijëra luftëtarë – Hezbollahu u detyrua të rindërtojë nga e para strukturën e tij ushtarake. Sipas burimeve të cituara nga FRANCE 24 dhe Reuters, këtë rol e mori drejtpërdrejt Islamic Revolutionary Guard Corps (IRGC), e cila ndërhyri për të rikthyer në këmbë aleatin e saj përpara përplasjes së fundit me Izraelin.
Sipas dy burimeve të njohura me aktivitetet e IRGC-së, Garda Revolucionare jo vetëm që ndihmoi në mbushjen e boshllëqeve në komandë duke vendosur oficerë iranianë, por edhe ristrukturoi plotësisht organizimin ushtarak të Hezbollahut. Kjo ndërhyrje konsiderohet e paprecedentë për grupin shiit libanez, i cili që nga themelimi në vitin 1982 është trajnuar dhe financuar nga Irani.
Investimi iranian duket se ka dhënë rezultat: Hezbollahu arriti të rikuperohej mjaftueshëm për t’u përfshirë në konfliktin e fundit në Lindjen e Mesme në krah të Teheranit, pasi u sulmua nga SHBA dhe Izraeli. Gjatë kësaj kohe, grupi ka lëshuar qindra raketa drejt Izraelit, duke nxitur një kundërofensivë ajrore dhe tokësore izraelite që ka shkaktuar mbi 1,000 viktima në Liban. Luftëtarët e Hezbollahut janë aktualisht në përplasje të drejtpërdrejta me trupat izraelite në jug të vendit.
Burimet thonë se oficerët e IRGC-së u dërguan në Liban menjëherë pas armëpushimit të nëntorit 2024 dhe nisën punën edhe ndërsa sulmet izraelite vijonin. Rreth 100 oficerë u përfshinë në këtë operacion, duke trajnuar sërish luftëtarët dhe duke mbikëqyrur riarmatimin e grupit. Një nga ndryshimet më të mëdha ishte kalimi nga një strukturë hierarkike në një sistem të decentralizuar, me njësi të vogla që operojnë të ndara dhe me njohuri të kufizuara për njëra-tjetrën – një strategji që synon të shmangë depërtimin e inteligjencës izraelite.
Po ashtu, IRGC hartoi plane për sulme të koordinuara me raketa kundër Izraelit, të lëshuara njëkohësisht nga Irani dhe Libani – një skenar që u realizua për herë të parë më 11 mars. Një burim i sigurisë libaneze konfirmon se komandantët iranianë ndihmuan në riorganizimin e strukturave ushtarake të Hezbollahut dhe në ritmin e konfliktit aktual, edhe pse nuk janë të përfshirë drejtpërdrejt në përzgjedhjen e objektivave.
Eksperti i sigurisë në King’s College London, Andreas Krieg, e përshkruan këtë transformim si kthim te modeli i viteve ’80: një strukturë e sheshtë, me qeliza të vogla dhe fleksibёl – një “mbrojtje mozaiku”, e përdorur edhe nga vetë IRGC në Iran.
Në të njëjtën kohë, përpjekjet e Iranit për të forcuar Hezbollahun kanë përplasur interesat me qeverinë libaneze, e cila – së bashku me ushtrinë e mbështetur nga SHBA – ka kërkuar çarmatimin e grupit. Një zyrtar libanez tha se rreth 100-150 shtetas iranianë me lidhje me qeverinë iraniane, përfshirë IRGC-në, ndodheshin në vend, dhe se në fillim të marsit u është kërkuar të largohen.
Sipas burimeve, më 7 mars mbi 150 iranianë, përfshirë anëtarë të IRGC-së, u larguan nga Bejruti me një fluturim drejt Rusisë. Megjithatë, prania e tyre kishte qenë e ndjeshme: rreth 500 persona me lidhje me IRGC janë vrarë nga sulmet izraelite në Liban gjatë 15 muajve pas armëpushimit të vitit 2024, ndërsa të paktën një duzinë të tjerë janë vrarë që nga nisja e luftës së fundit, përfshirë një sulm ndaj një hoteli në Bejrut më 8 mars.
Pavarësisht goditjeve të mëdha, Izraeli pranon se Hezbollahu mbetet një forcë e rrezikshme dhe aktive. Megjithatë, mbetet për t’u parë nëse grupi – ende më i dobët se në kulmin e tij – do të jetë në gjendje të përballojë një pushtim të plotë izraelit në të ardhmen.
(Burimi: France 24, Reuters)
