Dy aktorët Connor Storrie dhe Hudson Williams, të cilët janё aktorёt protagonistë të përfshirë në një romancë të fshehtë në serialin fenomen të HBO Max “Heated Rivalry”, janë përzgjedhur zyrtarisht si mbajtës të pishtarit të Lojërave Olimpike Dimërore Milano–Cortina 2026.
HBO Max dhe organizatorët e Olimpiadës njoftuan se dyshja do të jenë pjesë e stafetës së Flakës Olimpike, e cila do të udhëtojë nga Roma drejt Milanos përpara ceremonisë hapëse më 6 shkurt. Ende nuk është bërë publike dita kur Storrie dhe Williams do të shfaqen në itinerarin e stafetës, por përfshirja e tyre konsiderohet një nga momentet simbolike të eventit.
Kalimi nga rolet e tyre imagjinare si yje të hokejit në akullin olimpik – skena më e madhe reale e këtij sporti – është vetëm kapitulli më i ri në ngjitjen e tyre të rrufeshme drejt famës. Që nga debutimi i serialit më 28 nëntor, të dy aktorët kanë kaluar nga anonimiteti relativ në dy nga emrat më të përfolur të momentit në Hollywood.
Hudson Williams u përball me turma fansash gjatë hyrjes së tij në “The Tonight Show with Jimmy Fallon”, ndërsa një roje sigurie e NBC krahasoi reagimin e publikut me atë që kishte parë dikur për Harry Styles. Ndërkohë, emisioni “Late Night with Seth Meyers” u detyrua të njoftonte paraprakisht se nuk do të kishte bileta shtesë për paraqitjen e Connor Storrie, për shkak të interesit jashtëzakonisht të lartë.
Fenomeni “Heated Rivalry” tashmë është kudo: klasa tematike në SoulCycle, festa ku transmetohet nё sfond filmi në baret LGBT+, rrjete sociale të mbushura me meme, dhe një audiencë që është rritur pothuajse ekskluzivisht nga rekomandimet e shikuesve.
Seriali, i pёrshtatur nga Jacob Tierney mbi serinë e librave “Game Changers” të autores Rachel Reid, ndjek për tetë vite marrëdhënien mes Shane Hollander, një yll kanadez i hokejit (Williams), dhe Ilya Rozanov, rivali i tij rus (Storrie). Rivalë të ashpër në fushë, por partnerë të fshehtë jashtë saj, historia e tyre ka prekur publikun për mënyrën e ndërtimit të një romance gej në një botë sportive tradicionalisht “macho”.
(Burimi: CNN)
