Lufta nuk po përfundon. Gjasat tregojnë se ajo po rëndohet. Sulmet e Izraelit dhe SHBA-sё vazhdojnë dhe Irani nuk resht së dërguari bateri raketash në drejtim të Izraelit çdo ditë dhe natë. Po kështu godet edhe objekte “armiqësore” në shtetet e Gjirit Persik.
Lufta po degradon çdo ditë që kalon. Presidenti Trump ka ndryshuar gjuhën brenda disa ditëve. Sot ai deklaron se do jetë shumë vonë për Iranin nëse nuk arrin një marrëveshje dhe nuk hap menjëherë ngushticën e Hormuzit.
“Ura më e madhe në Iran shembet plotësisht, për të mos u përdorur më kurrë — shumë të tjera do ta pasojnë! ËSHTË KOHA QË IRANI TË BËJË NJË MARRËVESHJE PARA SE TË JETË SHUMË VONË, DHE PARA SE TË MOS MBETET ASGJË NGA AJO QË MUND TË BËHEJ NJË VEND I MADH! Presidenti DONALD J. TRUMP”
Raportimet nga Irani tregojnë një unitet kombëtar. Qëllimi i SHBA-sё për ndryshim regjimi nga brenda nuk po realizohet. E kundërta po ndodh. Po ndryshojnë njerëzit, e jo regjimi. Populli iranian po mblidhet nën flamurin dhe qeverisjen e tyre, kundër armiqve izraelo-amerikanë.
Në Iran po goditen objekte civile që në gjuhën e ligjit ndërkombëtar konsiderohet krim lufte.
Presidenti Trump tregoi në shenjë presioni bombardimin e urёs B1 nё Karaj, një provincё e Iranit. Nga sulmi janë raportuar dy viktima civile nga pala iraniane, e cila menjëherë reagoi se do hakmerret me hedhjen në erë të urave civile në shtetet që i konsideron armiqësore në Lindjen e Mesme.
Një ndërtesë tjetër, institut mjekësor që merrej me studime të thelluara ndaj sëmundjeve ngjitëse, u godit nga bombardimet në brendësi të Iranit. Agjencitë iraniane e raportuan këtë goditje jo vetëm ndaj objekteve civile por edhe atyre me vlera të veçanta historike. Instituti mjekësor ishte ndërtesë e ndërtuar që në vitin 1920, me një traditë të njohur në të gjithë Lindjen e Mesme.
Izraeli nuk po fiton as ndaj Iranit dhe as në sulmin e gjerë ndaj Libanit. Ndërkohë që të dyja shtetet e sulmuara janë bërë burim i sulmeve me raketa dhe dronë që nuk reshtin ndaj të gjitha qyteteve në gjithë Izraelin, duke e vendosur popullin civil në një gjendje të përditshme alarmi dhe lufte.
Ditët që vijnë janë vendimtare për çështjen që ka mbërthyer gjithë botën: Do pushojë apo do degradojë lufta në Lindjen e Mesme.
