Nick Reiner, djali 32-vjeçar i regjisorit të njohur Rob Reiner, vuante nga dhe u bë gjithnjë e më i paqëndrueshëm dhe potencialisht i rrezikshëm pasi mjekët i ndryshuan trajtimin psikiatrik disa javë para se prindërit e tij të gjendeshin të vrarë, sipas burimeve të afërta me hetimin.
Burime i kanë thënë TMZ-sё se Nick po ndiqej nga një psikiatër për gjendjen e tij mendore, e cila ishte përkeqësuar ndjeshëm në muajt e fundit. Sipas tyre, pas ndryshimit të medikamenteve, sjellja e tij u bë “alarmante”, me episode të shpeshta çrregullimi dhe humbje kontrolli.
Mësohet se ai ishte kuruar edhe nё një qendër rehabilitimi në Los Angeles, e specializuar në trajtimin e abuzimit me substanca, me një kosto mujore që arrinte deri në 70 mijë dollarë. Megjithatë, burimet pohojnë se në javët para ngjarjes gjendja e tij u përkeqësua edhe më shumë, duke e bërë atë gjithnjë e më të paparashikueshëm.
Të shtunën në mbrëmje, vetëm një ditë para se prindërit e tij të gjendeshin të vdekur, Nick ishte i pranishëm në një festë të organizuar nga Conan O’Brien. Sipas të ftuarve, sjellja e tij ishte e pazakontë dhe antisociale, përfshirë shikime kërcënuese ndaj të pranishmëve dhe një debat të ashpër me të atin. Dëshmitarë kanë thënë se pati edhe një moment tensioni mes Nick-ut dhe komedianit Bill Hader.
Burime për Rolling Stone kanë pohuar se Rob Reiner dhe bashkëshortja e tij, Michele, kishin shprehur shqetësim serioz për gjendjen mendore të djalit dhe kishin kërkuar ta sillnin me vete në event për ta mbajtur nën vëzhgim.
Sipas informacioneve të tjera të cituara nga Daily Mail, përdorimi i drogës nga Nick kishte dalë jashtë kontrollit pasi prindërit e kishin paralajmëruar se do ta nxirrnin nga shtëpia. Ai kishte jetuar në pronën e tyre në Los Angeles për rreth pesë vite, kryesisht në një shtëpi për mysafirë, ku sjellja e tij thuhet se ishte bërë gjithnjë e më e frikshme dhe e paqëndrueshme.
Familjarë dhe burime pranë familjes Reiner kanë deklaruar se Nick përjetonte shpërthime të dhunshme, periudha pa gjumë për ditë të tëra dhe episode shkatërrimi, duke e përshkruar situatën si “një bombë me sahat”. Ata pohojnë se prindërit e tij ishin thellësisht të shqetësuar dhe kërkonin që ai të largohej nga shtëpia për shkak të rrezikut që po përfaqësonte.
Hetimet për ngjarjen vijojnë, ndërsa autoritetet nuk kanë dhënë ende një version përfundimtar mbi rrethanat dhe motivet e krimit.
(Burimi: Daily Mail)
