Një i dënuar në Karolinën e Jugut është planifikuar të ekzekutohet të premten me skuadrën e pushkatimit, duke u bërë personi i tretë në shtet këtë vit që vdes përmes kësaj metode.
Tre punonjës të burgut, të gjithë me municion të vërtetë, kanë dalë vullnetarë për të kryer ekzekutimin e Stephen Bryant, 44 vjeç, i cili vrau tre persona brenda pesë ditëve në një zonë rurale të shtetit në vitin 2004.
Bryant aktualisht nuk ka apelime aktive përpara ekzekutimit të planifikuar për në orën 18:00 me orën amerikane, në qendrën e të dënuarve me vdekje në Broad River Correctional Institution në Columbia.
Ai mund t’i kërkojë guvernatorit falje, por vendimi zakonisht bëhet publik vetëm pak minuta para se të nisë ekzekutimi. Asnjë guvernator i Karolinës së Jugut nuk ka dhënë falje për dënim me vdekje që nga rikthimi i tij në SHBA në vitin 1976.
Historia e metodës së pushkatimit
Skuadra e pushkatimit ka një histori të gjatë dhe të përgjakshme në botë, duke u përdorur për ndëshkimin e dezertimeve në ushtri, si drejtësi në Perëndimin e Egër amerikan dhe si mjet terrori politik në Bashkimin Sovjetik dhe Gjermaninë naziste.
Por vitet e fundit, kjo metodë është rikthyer në SHBA, pasi ligjvënës të caktuar e konsiderojnë si mënyrën më të shpejtë dhe më humane të ekzekutimit — duke marrë parasysh numrin e problemeve të rënda me ekzekutimet me injeksion vdekjeprurës dhe mungesën e barnave përkatëse.
Për këto arsye, Karolina e Jugut pezulloi ekzekutimet për 13 vjet, deri sa i rifilloi në shtator 2024. Që atëherë, katër burra janë ekzekutuar me injeksion vdekjeprurës dhe dy me skuadër pushkatimi. Shteti gjithashtu e lejon ende karrigen elektrike.
Krimet e vitit 2004
Bryant pranoi se vrau Willard “TJ” Tietjen në tetor 2004, pasi shkoi në shtëpinë e tij në një zonë të izoluar të qarkut Sumter duke pretenduar se kishte probleme me makinën. Ai e qëlloi disa herë dhe më pas u përgjigj në telefon, duke i thënë gruas dhe vajzës së viktimës se ishte vrasësi.
Ai gjithashtu vrau dy burra të tjerë — një përpara dhe një pas vrasjes së Tietjen — duke i qëlluar në shpinë pasi i kishte marrë në makinë dhe ata zbrisnin për të urinuar në anë të rrugës.
Avokatët e Bryant thanë se ai kishte probleme të rënda psikologjike dhe kishte kërkuar ndihmë para vrasjeve, duke deklaruar se nuk arrinte të përballonte traumën e abuzimit seksual të fëmijërisë dhe përdorte metanfetaminë dhe lëndë të tjera toksike për t’u qetësuar.
Bryant do të jetë personi i 43-të i ekzekutuar këtë vit në SHBA dhe i 50-ti i ekzekutuar në Karolinën e Jugut që nga rinisja e dënimit me vdekje 40 vite më parë.
Si kryhet një ekzekutim me skuadrën e pushkatimit
Në orën 18:00 të së premtes, perdja në dhomën e ekzekutimit do të hapet para një duzine dëshmitarësh pas një xhami antiplumb.
Bryant do të lidhet në një karrige, dhe një mjek do të vendosë një shenjë të bardhë me shenjë qendre të kuqe mbi zemrën e tij. Më pas, një punonjës do t’i vendosë një kapuç në kokë dhe do të hapë një perde të zezë pas së cilës presin ekzekutorët.
Pa paralajmërim, tre gardianët do të qëllojnë nga rreth 4.6 metra larg.
Një mjek do të hyjë pas një ose dy minutash për të konstatuar vdekjen.
Avokatët e të ekzekutuarit të fundit me këtë metodë, Mikal Mahdi, thanë se ekzekutorët nuk qëlluan dot direkt në shenjë në zemrën e tij, duke i shkaktuar vuajtje të zgjatur e të rëndë.
(Përshtatur në shqip nga kontrasT.al, Burimi: U.S. News / Associated Press)
