Kujtim Spahivogli lindi më 30 qershor të vitit 1932 në Lushnje. Studimet e larta për teatër i kreu në Moskë në vitin 1956. Ishte një ndër studentët e shkëlqyer të ardhur nga Bashkimi Sovjetik dhe në vitin 1956 u emërua aktor në Teatrin Popullor.
Roli i tij i parë në skenën e Teatrit Popullor ishte Xherxhinski në dramën “Orët e Kremlinit”, dhe më pas luajti një sërë rolesh në dramat “Majlinda”, “Në anën tjetër”, “Dragoi i Dragobisë”, “Hamleti”, etj. Por më shumë u shqua si regjisor në Teatrin Popullor dhe si pedagog në Institutin e Lartë të Arteve. Ka vënë në skenë pjesët: “I Çuditshmi”, “Gratë gazmore të Uindsorit”, “Në tufan”, “Shtëpia në bulevard”, “Drita”, “Karnavalet e Korçës”, “Qielli i kuq”, etj.
Kujtim Spahivogli ishte edhe krijues e drejtues i “Teatrit të të Rinjve” i cili u krijua pranë Institutit të Lartë të Arteve. Në mes të pak pjesëve që vuri në skenë me atë trupë, ishte edhe komedia e njohur e Majakovskit “Banja”. Në rolin e dramaturgut krijoi dramën e tij “Një shok i klasës sonë”, shfaqje e cila pati një sukses të madh. Vdiq më 7 korrik të vitit 1987, në moshën pesëdhjetepesë-vjeçare, i sëmurë e i harruar, edhe pse kishte qenë një ndër regjisorët e spikatur të teatrit shqiptar.
Pas vdekjes, në vitet ‘90 iu dha titulli “Artist i Popullit” dhe sot Teatri Kombëtar Eksperimental mban emrin e pavdekshëm të aktorit, dramaturgut dhe regjisorit, Kujtim Spahivogli.
