Sapo përfundoi protesta kombëtare e Opozitës. Pas disa molotovëve të hedhur në derën e kryeministrisë, këmbët e policisë, demonstrimi i “forcës” së Partisë Demokratike përfundoi me një xhiro “Alla Luli” nga Bulevardi kryesor në rrugicën përballë Parlamentit.
Sali Berisha solli një risi këtë herë në fjalimin e tij. U bëri thirrje intelektualëve dhe shoqërisë civile pa dallim t’i bashkohen Opozitës, në shesh, në demonstrimet kundër Qeverisë.
Si çdo herë në protesta të ngjashme një etiketë u vendos edhe për Edi Ramën. Tashmë ai u damkos me emrin Kapobanda.
Thirrja popullit dhe intelektualëve për t’iu bashkuar “zjarrit” të PD-së që do djegë mandatin e kryeministrit Edi Rama dhe qeverisë së tij, u përsërit edhe në fund të fjalimit mbyllës që Berisha mbajti në shkallët e selisë së PD-së.
Lideri i opozitës mbajti “gjallë” shpresat e Opozitarëve me premtimin se herën tjetër pikat e protestës do jenë Kryeministria, Kuvendi dhe Surreli. Këtë destinacion të fundit nuk e përcaktoi si shtëpi të Edi Ramës por si vend ku mund të jenë tunelët ku janë fshehur “shishet e verës” së krimit.
Mesazhi i Berishës në mbyllje të protestës nuk ishte një urim për festat por njëkohësisht ishte një “dhuratë” për popullin opozitar.
Në sheshin e protestës përveç thirrjeve me mikrofon të Belind Këlliçit dhe Klevis Balliut drejtuar turmës, “rivali” i tyre Ervin Salianji jepte intervista nga pozitat e protestuesit të thjeshtë.
Ndryshim nga çdo herë më parë ishte “ballafaqimi” i protestuesve me policinë që zgjati më shumë se herët e tjera. Molotovët u hodhën për një kohë më të gjatë, në drejtim të dyerve të kryeministrisë.
