Kosova ka shënuar një tjetër sukses të rëndësishëm diplomatik. Komonuelthi i Bahamas e ka njohur zyrtarisht Republikën e Kosovës si shtet të pavarur dhe sovran, duke u bërë kështu shteti i 121-të që e njeh pavarësinë e Kosovës.
Lajmi u bë i ditur nga Presidentja e Republikës së Kosovës, Vjosa Osmani, e cila njoftoi se marrëveshja për njohje dhe vendosje të marrëdhënieve diplomatike është nënshkruar në kryeqytetin e Bahamas, pas një takimi me Kryeministrin e këtij shteti, Philip Davis.
Njohja u formalizua përmes një Deklarate të Përbashkët, me të cilën dy shtetet konfirmojnë vendosjen e marrëdhënieve diplomatike në përputhje me të drejtën ndërkombëtare dhe Konventën e Vjenës për Marrëdhëniet Diplomatike të vitit 1961.
Në deklaratë, Kosova dhe Bahamas riafirmojnë përkushtimin ndaj Kartës së Kombeve të Bashkuara, duke theksuar respektimin e sovranitetit, barazisë mes shteteve dhe zgjidhjen paqësore të mosmarrëveshjeve. Po ashtu, palët shprehin gatishmërinë për të ndërtuar një partneritet të qëndrueshëm dhe konstruktiv, të bazuar në respekt të ndërsjellë dhe reciprocitet.
Marrëveshja parasheh edhe thellimin e bashkëpunimit bilateral në fusha me interes të përbashkët, përfshirë:
- konsultimet politike,
- tregtinë dhe investimet,
- turizmin,
- arsimin dhe kulturën,
- teknologjinë dhe inovacionin, si dhe
- bashkëpunimin në sektorin publik.
Kjo njohje vlerësohet si një hap i rëndësishëm në zgjerimin e pranisë diplomatike të Kosovës në arenën globale.
Presidentja Osmani e cilësoi vendimin si historik për vendin, duke theksuar se ai përfaqëson një tjetër dëshmi të mbështetjes ndërkombëtare për shtetësinë e Kosovës.
Statusi i plotë i Presidentes Vjosa Osmani në Facebook:
Bahamas njeh Kosovën! 
Edhe një vendim historik për vendin tonë.
Bahamas bëhet shteti i 121-të që njeh Kosovën si shtet të pavarur e sovran. Urime të gjithë qytetarëve të Republikës sonë!
Sapo kemi nënshkruar, këtu në kryeqytetin e Bahamas, marrëveshjen dypalëshe për njohje dhe vendosje të marrëdhënieve diplomatike me Kryeministrin e Bahamas, mikun tonë të mirë Philip Davis.
Më poshtë Deklarata e plotë:
Deklaratë e përbashkët e Komonuelthit të Bahamas dhe Republikës së Kosovës për njohje dhe vendosje të marrëdhënieve diplomatike.
Komonuelthi i Bahamas dhe Republika së Kosovës njoftojnë se Komonuelthi i Bahamas e ka njohur Republikën e Kosovës si shtet të pavarur dhe sovran.
Të dyja shtetet njoftojnë gjithashtu vendosjen e marrëdhënieve diplomatike ndërmjet Komonuelthit të Bahamas dhe Republikës së Kosovës, me efekt nga data e nënshkrimit të Marrëveshjes së Përbashkët për vendosjen e marrëdhënieve diplomatike, në përputhje me të drejtën ndërkombëtare dhe Konventën e Vjenës për Marrëdhëniet Diplomatike të vitit 1961.
Të dyja shtetet riafirmojnë përkushtimin e tyre ndaj qëllimeve dhe parimeve të Kartës së Kombeve të Bashkuara, përfshirë respektimin e sovranitetit, barazisë së shteteve dhe zgjidhjen paqësore të mosmarrëveshjeve. Ato bien dakord ta zhvillojnë marrëdhënien e tyre mbi bazën e respektit të ndërsjellë, reciprocitetit dhe angazhimit konstruktiv.
Bahamas dhe Kosova shprehin synimin e tyre për të thelluar bashkëpunimin në fusha me interes të përbashkët, përfshirë konsultimet politike, tregtinë dhe investimet, turizmin, arsimin dhe kulturën, teknologjinë dhe inovacionin, bashkëpunimin në sektorin publik, si dhe shkëmbimet ndërmjet njerëzve, në përputhje me ligjet dhe procedurat e secilit shtet respektiv.
Komonuelthi i Bahamas dhe Republika e Kosovës mirëpresin ndërtimin e një partneriteti të ngrohtë dhe produktiv, i cili u shërben interesave të të dy popujve dhe kontribuon në paqen dhe bashkëpunimin ndërkombëtar.
