Në mes të Detit të Kinës Jugore fshihet një vend që duket sikur nuk i përket kësaj bote. Një gropë gjigante nënujore, e errët, pa oksigjen dhe pa asnjë rreze drite, por që megjithatë strehon jetë të pazakontë. Shkencëtarët që zbritën në këtë humnerë zbuluan mijëra mikroorganizma të panjohur dhe mbi 1,700 lloje virusesh misterioze, shumë prej të cilëve nuk janë klasifikuar kurrë më parë.
Kjo strukturë quhet “Vrima e Dragoit” dhe është një nga gropat nënujore më të thella të njohura në planet. Me afro 1,000 metra thellësi dhe mbi 160 metra gjerësi, ajo u hartëzua për herë të parë në vitin 2016 nga studiues kinezë. Mendohet se është formuar mijëra vite më parë, kur niveli i detit ishte më i ulët dhe uji i shiut gërryente shkëmbin gëlqeror, duke krijuar një zgavër të thellë me mure të pjerrëta. Më pas, me rritjen e nivelit të detit, zgavra u mbush me ujë dhe u shndërrua në atë që shohim sot.
Ajo që e bën këtë vend të jashtëzakonshëm është izolimi i tij. Për shkak të hyrjes së ngushtë dhe mureve të thepisura, ujërat e sipërfaqes nuk përzihen me ato të thellësisë. Oksigjeni zhduket shpejt disa dhjetëra metra poshtë sipërfaqes dhe më thellë mbretëron errësira totale. Kjo krijon shtresa uji me përbërje kimike të ndryshme, secila me format e veta të jetës.
Pas rreth 100 metrash thellësi, nuk ka më peshq, bimë apo alga. Por jeta nuk zhduket. Në vend të saj shfaqen baktere që mbijetojnë pa oksigjen dhe pa dritë, duke prodhuar energji përmes reaksioneve kimike. Në shtresat e para pa oksigjen dominojnë baktere që përdorin sulfurin, ndërsa më poshtë shfaqen mikrobe edhe më të specializuara, të afta të jetojnë në kushte që për shumicën e organizmave do të ishin vdekjeprurëse.
Kur studiuesit analizuan mostrat në laborator, arritën të rrisin qindra lloje bakteresh, një pjesë e mirë e të cilave rezultuan të panjohura më parë për shkencën. Por surpriza më e madhe erdhi nga bota e viruseve. Në këtë ekosistem të mbyllur u identifikuan 1,730 tipe virusesh, kryesisht që infektojnë bakteret. Megjithatë, në shtresat më të thella u gjetën edhe viruse që nuk i përkisnin asnjë grupi të njohur deri sot.
Shkencëtarët besojnë se këta viruse të panjohur mund të luajnë rol kyç në ekuilibrin e këtij ekosistemi ekstrem, duke kontrolluar popullatat mikrobike dhe duke ndikuar në ciklet kimike të mjedisit. Për këtë arsye, “Vrima e Dragoit” po shihet si një laborator natyror unik për të kuptuar se si jeta mund të mbijetojë në kushte që ngjajnë me mjedise të lashta të Tokës – ose ndoshta edhe me botë të tjera në hapësirë.
Në një vend ku nuk ka dritë, nuk ka oksigjen dhe ku heshtja është absolute, shkencëtarët kanë gjetur një univers të fshehur. Një botë mikroskopike që tregon se jeta, në format e saj më të çuditshme, mund të lulëzojë edhe aty ku dikur mendohej se ishte e pamundur.
(Burimi: Daily Galaxy)
