Tre murgesha të moshuara në Salzburg të Austrisë—motrat Regina, 86 vjeç, Rita, 81 vjeç dhe Bernadette, 88 vjeç—u bënë të famshme ndërkombëtarisht pasi në shtator “ia dolën” të largoheshin nga shtëpia e të moshuarve dhe të riktheheshin fshehurazi në manastirin ku kishin kaluar pjesën më të madhe të jetës së tyre. Ndihmuar nga ish-nxënëset e tyre tё shkollës së vajzave nё manastir, ato përdorën madje edhe një bravandreqës për të hyrë në ndërtesë, duke e shndërruar historinë e tyre në një sensacion mediatik.
Murgeshat u bënë të famshme edhe në rrjetet sociale, duke mbledhur rreth 100 mijë ndjekës në Instagram, ku postonin rutinën e tyre të përditshme: lutje, takime me komunitetin dhe, për habinë e ndjekësve, ushtrime boksi për të mbajtur trupin nё formё. Postimet e tyre frymëzuan shumë njerëz, duke krijuar një valë mbështetjeje për përpjekjen e tyre për të ruajtur mënyrën e jetesës nё manastir.
Tani, tre muaj pas rikthimit të tyre në Schloss Goldenstein—manastirin mes alpeve që dikur e quanin shtëpi—dioqeza lokale ka konfirmuar se murgeshat do të lejohen të qëndrojnë.
Megjithatë, vendimi vjen me kushte të rrepta: ato duhet të mbyllin menjëherë llogaritë e tyre në rrjetet sociale, të rikthehen në një jetë më të izoluar dhe të futen në listën e pritjes për t’u rikthyer në shtëpinë e të moshuarve kur përkujdesja brenda manastirit të mos jetë më e mundur.
Ndërkohë, atyre do t’u sigurohet kujdes mjekësor 24 orësh dhe asistencë shpirtërore nga një prift. Ky vendim vjen pas një mosmarrëveshjeje të gjatë mes murgeshave dhe udhëheqjes kishtare, një përplasje që filloi dy vite më parë, kur, sipas motrave, ato u larguan nga manastiri kundër dëshirës së tyre. Çështja u përshkallëzua më tej në gusht të këtij viti, kur ato bënë akuza publike kundër Kryedioqezës së Salzburgut, të raportuara gjerësisht nga mediat austriake.
(Pёrshtatur nga CNN)
