Zyrtarët e Akademisë Nobel janë vënë në një situatë të paprecedentë: nuk dinë nëse fituesja e Çmimit Nobel për Paqen, opozitarja venezueliane María Corina Machado, do të mund të marrë pjesë në ceremoninë zyrtare. Machado — e cila ndodhet në arrati që pas zgjedhjeve të kontestuara të vitit 2024 — duhej të paraqitej të mërkurën në Oslo, por një konferencë e planifikuar për shtyp u anulua papritur.
Instituti Nobel deklaroi se vendndodhja e saj aktuale është e panjohur, edhe pse Machado shfaqet rregullisht në video mesazhe në rrjetet sociale, zakonisht përballë një muri të bardhë neutral. Më herët, Instituti kishte thënë se ajo do të ishte fizikisht e pranishme në ceremoni, por tani pranon se udhëtimi “është jashtëzakonisht sfidues”.
Familja e Machado-s ndodhet tashmë në Oslo, por qeveria e Venezuelës paralajmëron se nëse ajo largohet nga vendi, konsiderohet automatikisht “e arratisur”, duke qenë se ndaj saj janë hapur hetime penale për “konspiracion”, “nxitje urrejtjeje” dhe “terrorizëm”.
Machado është figura më e njohur e opozitës venezueliane dhe u vlerësua me Çmimin Nobel për Paqen për përpjekjet e saj të vazhdueshme për rikthimin e demokracisë në vend. Ajo është ndaluar të kandidojë në zgjedhje, ndërsa opozita pretendon se fitoi votimet e vitit 2024, pavarësisht shpalljes së Nicolás Maduro-s si fitues. Disa vende, përfshirë SHBA-në, e kanë njohur kandidatin e opozitës, Edmundo González, si presidentin e zgjedhur.
Nëse Machado paraqitet në Oslo, kjo do të ishte dalja e saj e parë publike që nga 9 janari, kur ajo mori pjesë në një protestë në Karakas kundër inaugurimit të Maduro-s. Ajo i ka premtuar mbështetësve se do të kthehet në Venezuelë pas ceremonisë — një premtim që tashmë duket gjithnjë e më i vështirë për t’u realizuar.
Për momentin, misteri vijon: A do të guxojë fituesja e Nobelit të Paqes të shfaqet në skenën botërore?
