Pas valës së reagimeve që shkaktoi lajmi për një fushatë bamirësie në emrin e tij, aktori i njohur amerikan Mickey Rourke ka reaguar ashpër, duke mohuar se ka kërkuar apo pranuar ndihma financiare. Ish-ylli i Hollivudit e cilësoi iniciativën si “poshtëruese” dhe deklaroi se nuk ka nevojë për bamirësi, pavarësisht pretendimeve se po përballet me vështirësi serioze ekonomike.
Rourke publikoi një video ku shprehet i irrituar dhe i hutuar nga situata, duke thënë se nuk ka dhënë pëlqimin për krijimin e një faqeje GoFundMe, e cila synonte të mblidhte dhjetëra mijëra dollarë për të shlyer qiranë e prapambetur të apartamentit të tij në Los Angeles. “Nuk pranoj lëmoshë. Kjo është poshtëruese për mua”, u shpreh aktori, duke distancuar veten nga çdo formë ndihme publike.
Fushata ishte iniciuar nga Liya-Joelle Jones, e cila menaxhon financat e tij dhe kishte deklaruar se Rourke ndodhej në një gjendje të rëndë ekonomike, madje në rrezik për të mbetur pa strehë. Sipas saj, aktori ishte detyruar të largohej nga banesa ku jetonte, e cila thuhet se ishte e pabanueshme, pa ujë të rrjedhshëm dhe e mbuluar nga myku. Jones tha se Rourke ishte zhvendosur përkohësisht në një hotel dhe më pas në një apartament tjetër në zonën Koreatown, ndërsa sendet e tij personale ishin vendosur në depo.
Në një deklaratë për The Hollywood Reporter, ajo pranoi se ishin mbledhur afro 100 mijë dollarë për ta ndihmuar, por shtoi se fondet mund të kthehen nëse aktori nuk dëshiron t’i përdorë. Për Rourke, megjithatë, çështja lidhet me dinjitetin e tij personal, pavarësisht nevojës ekonomike.
Aktori, i njohur për rolet e tij ikonike në filma si “Nëntë javë e gjysmë”, “Orkide e egër” dhe rikthimin e bujshëm me “The Wrestler” në vitin 2008 – që i solli edhe një nominim për Oscar – duket se po përballet jo vetëm me vështirësi ekonomike, por edhe me një betejë publike për mënyrën se si perceptohet sot figura e tij.
(Burimi: ANSA)
