Tensionet mes Hungarisë dhe Bashkimit Europian po hyjnë në një fazë të re përplasjesh të hapura, pasi Kryeministri Viktor Orban ka deklaruar publikisht se vendi i tij nuk do të pranojë asnjë emigrant të paligjshëm, pavarësisht sanksioneve të rënda financiare të vendosura nga institucionet evropiane. Në një mesazh të publikuar në rrjetet sociale, Orban e bëri të qartë se qeveria e Budapestit nuk ka ndërmend të ndryshojë strategjinë e saj të fortë për mbrojtjen e kufijve, duke konfirmuar se është e gatshme të përballojë çdo penalizim.
“Një gjobë prej një milion eurosh në ditë nga Brukseli për mospranimin e emigrantëve të paligjshëm? Ne do ta paguajmë. Kjo është më mirë sesa të jetosh me frikë,” shkroi Kryeministri hungarez Orban, duke theksuar se përballja me BE-në nuk e frikëson. Ai u bëri gjithashtu thirrje vizitorëve të huaj që të zgjedhin Hungarinë për festat e Krishtlindjeve, duke premtuar se vendi do t’i tregojë Evropës “siç duhet të jetë”.
Politika hungareze e emigracionit ka mbetur ndёr më të ashprat në Evropë që prej shpërthimit të krizës së refugjatëve në kontinent, me kontrolle të forta kufitare dhe refuzim të zhvendosjes së detyruar të emigrantëve. Qasja e Orban ka shkaktuar kritika të vazhdueshme nga organizatat humanitare të OKB-së dhe institucionet e BE-së, të cilat e kanë akuzuar Budapestin për shkelje të të drejtave të njeriut dhe të ligjeve evropiane të azilit.
Në qershor të vitit 2024, Gjykata e Drejtësisë së Bashkimit Evropian në Luksemburg urdhëroi Hungarinë të paguajë 200 milionë euro gjobë dhe një penalitet shtesë prej 1 milion eurosh për çdo ditë vonesë, për shkak të refuzimit të saj për t’iu përmbajtur vendimeve të mëparshme që lidhen me standardet e përbashkëta të BE-së për pritjen e migrantëve. Vendimi u konsiderua si një nga masat më të rënda të marra ndonjëherë kundër një shteti anëtar.
Orban reagoi ashpër pas vendimit, duke thënë se qeveria e tij nuk do të ndryshonte kurs dhe duke akuzuar Gjykatën se ishte e kontrolluar nga figura e financimit global, George Soros, të cilin ai e ka sulmuar vazhdimisht gjatë viteve të fundit për ndërhyrje në politikat evropiane të migracionit.
Përplasja e hapur mes Budapestit dhe Brukselit rrezikon të thellojë edhe më tej ndasitë politike brenda Unionit, në një moment kur BE-ja po përpiqet të krijojë një strategji të përbashkët për menaxhimin e kufijve dhe sistemin e azilit, ndërsa mbështetja për forcat euroskeptike po rritet në disa vende anëtare.
(Burimi: TGcom)
