Papa Leo XIV nisi të enjten udhëtimin e parë jashtë Italisë që prej zgjedhjes së tij si drejtues i Kishës Katolike, duke mbërritur në Ankara për një vizitë zyrtare në Turqi, ku u prit nga presidenti Recep Tayyip Erdogan. Që në fjalën e tij të parë, Papa bëri thirrje për paqe dhe dialog, duke vlerësuar rolin e Turqisë si urë mes Lindjes dhe Perëndimit në një periudhë ku konfliktet globale po intensifikohen. Ai tha se vendi ka potencial të jetë faktor afrimi mes popujve, jo vetëm për shkak të pozicionit gjeopolitik, por edhe falë larmisë së brendshme kulturore dhe fetare, të cilën e përkufizoi si pasuri dhe jo si pengesë.
Ati i Shenjtë nënvizoi se shoqëritë janë të gjalla kur pranojnë pluralizmin dhe se uniformiteti çon vetëm në varfërim shpirtëror e shoqëror. Duke iu drejtuar autoriteteve turke, ai theksoi se të krishterët në vend, megjithëse pakicë prej rreth 100 mijë besimtarësh në një popullsi prej 86 milionësh, dëshirojnë të kontribuojnë pozitivisht në jetën kombëtare dhe e konsiderojnë veten pjesë të identitetit turk. Papa Leo theksoi rëndësinë e respektimit të dinjitetit dhe lirisë së çdo individi, duke kujtuar se feja duhet të shërbejë si urë bashkimi dhe jo si burim ndarjeje.
Vizita e tij filloi me homazhe në mauzoleumin e Mustafa Kemal Ataturkut, një gjest simbolik që u ndoq nga mediat ndërkombëtare, pasi më shumë se 80 gazetarë udhëtojnë me të në këtë tur historik. Që prej zgjedhjes në maj, Papa Leo është shfaqur si komunikues i aftë dhe pritet që të gjitha fjalimet gjatë vizitës t’i mbajë në anglisht, gjuhën e tij amtare.
Agjenda e së premtes do të zhvendoset në Iznik, ku Papa do të marrë pjesë në përkujtimin e 1700-vjetorit të Koncilit të Parë të Nikeas, me ftesë të Patriarkut Bartholomeu I, kreu i Ortodoksëve. Ai e cilësoi këtë takim një mundësi të jashtëzakonshme për të avancuar dialogun dhe unitetin e botës së krishterë, në një kohë kur raportet midis Kishës Katolike dhe asaj Ortodokse vijojnë të jenë të ndërlikuara dhe të prekura nga fragmentimi i brendshëm, sidomos pas luftës në Ukrainë.
Pas qëndrimit katërditor në Turqi, Ati i Shenjtë do të udhëtojë të dielën drejt Libanit — një vend me mozaik të gjerë fetar dhe me një realitet të rëndë ekonomik e politik, që së fundmi është goditur sërish nga bombardime izraelite pavarësisht armëpushimit.
Vizita e Papa Leos XIV përbën një moment simbolik për botën e krishterë dhe diplomacinë ndërkombëtare, me mesazhin qendror të paqes dhe unitetit në një periudhë tensioni të thellë global.
(Pёrshtatur nga FRANCE 24)
