Papa Leo XIV ka dënuar ashpër atë që e quajti “diplomaci e bazuar në forcë” dhe “ethe lufte që po përhapen”, në një fjalim të fortë drejtuar trupit diplomatik në Vatikan. Deklarata e tij vjen në një moment tensioni të lartë global.
“Diplomacia që promovon dialogun dhe konsensusin po zëvendësohet nga diplomacia e forcës, qoftë nga individë apo aleanca. Lufta është bërë sërish ‘në modë’ dhe një ethe për luftë po përhapet,” tha Papa. “Kjo kërcënon rëndë shtetin e së drejtës, që është themeli i bashkëjetesës paqësore.”
Edhe pse nuk përmendi drejtpërdrejt liderë botërorë, mesazhi i tij u pa gjerësisht si kritikë e qartë ndaj linjës së ashpër të administratës Trump.
Papa bëri thirrje të drejtpërdrejtë për respektimin e vullnetit të popullit venezuelian dhe mbrojtjen e të drejtave civile. Ai ka përsëritur disa herë javët e fundit se sovraniteti i shteteve dhe dinjiteti i popujve nuk mund të vendosen nën logjikën e forcës ushtarake. Që prej zgjedhjes së tij si Papa i parë me origjinë amerikane, Leo XIV është shfaqur si një zë kritik ndaj politikave të ashpra të Uashingtonit, veçanërisht për emigracionin dhe ndërhyrjet ushtarake.
Në fjalimin e tij, ai paralajmëroi për “pasojat shkatërrimtare të luftës”, duke përmendur spitalet e bombarduara, shtëpitë e rrënuara dhe infrastrukturën e shkatërruar. Ai i kërkoi Kombeve të Bashkuara të luajnë rol më aktiv në ndërmjetësimin e konflikteve dhe në mbështetjen humanitare.
Ukraina zuri një vend qendror në mesazhin e Papës. Ai përmendi “vuajtjen e popullsisë civile” dhe kërkoi armëpushim të menjëhershëm dhe dialog. Thirrja e tij erdhi në të njëjtën ditë kur Rusia njoftoi përdorimin e raketave balistike me kapacitet bërthamor në sulme ndaj Ukrainës perëndimore.
Papa Leo XIV foli edhe për krizat e tjera globale: dhunën ndaj palestinezëve në Bregun Perëndimor, situatën e rëndë humanitare në Sudan dhe Mianmar, pasigurinë në Haiti, si edhe dhunën me motive fetare në Bangladesh, Nigeri dhe Mozambik.
Mesazhi i tij ishte i qartë: bota po hyn në një fazë të rrezikshme, ku forca po zëvendëson dialogun — dhe kjo, sipas tij, është kërcënimi më i madh për paqen globale sot.
(Burimi: TIME)
