Rajoni i Parisit ka inauguruar teleferikun e parë urban, një projekt inovativ që synon të shkurtojë ndjeshëm kohën e udhëtimit dhe të lidhë lagjet e izoluara periferike me rrjetin e metrosë. Linja e re ajrore, e quajtur C1, u hap zyrtarisht të shtunën në juglindje të kryeqytetit francez.
Teleferiku përshkon një distancë prej 4.5 kilometrash, duke lidhur Créteil me Villeneuve-Saint-Georges, përmes Limeil-Brevannes dhe Valenton. Udhëtimi zgjat vetëm 18 minuta, krahasuar me rreth 40 minuta me autobus ose makinë, dhe siguron lidhje direkte me linjën 8 të metrosë së Parisit.
Sistemi përbëhet nga 105 kabina, secila me kapacitet për 10 pasagjerë, dhe pritet të transportojë rreth 11 mijë persona në ditë. Projekti, me vlerë 138 milionë euro, u cilësua nga autoritetet si një alternativë shumë më ekonomike se ndërtimi i një linje të re metroje, që do të kushtonte mbi 1 miliard euro.
Teleferiku urban është pjesë e një tendence në rritje në Francë për përdorimin e transportit ajror urban për të lidhur zona të vështira për t’u shërbyer nga infrastruktura tradicionale. Me këtë projekt, Parisi i bashkohet qyteteve si Brest, Toulouse dhe Grenoble, ku teleferikët janë kthyer në zgjidhje praktike dhe simbol të mobilitetit modern.
(Burimi: France 24 me AFP)
