Anëtari më i ri i Gjykatës Kushtetuese është gjyqtari Asim Vokshi. Me një ceremoni të thjeshtë protokollare, në prani të Presidentit të Republikës, Bajram Begaj, Asim Vokshi me dorën në Kushtetutën e Shqipërisë, tha “Betohem”, se do t’i qëndronte besnik asaj.
Asim Vokshi merr detyrën me një mandat të plotë 9-vjeçar që përfundon në vitin 2034, duke zëvendësuar Holta Zaçajn, mandati i së cilës ishte vetëm trevjeçar dhe kishte mbaruar në muajin prill të këtij viti.
Gjykata e Lartë e shpalli fitues Asim Vokshin për zëvendësimin e Zaçajt, me një rezultat të ngushtë – vetëm një votë më tepër se sa rivalja e tij në këtë konkurrim, Naureda Llagami. Kjo e fundit e kundërshtoi vendimin e votimit për zgjedhjen e Asim Vokshit në Gjykatën Administrative, më pas edhe në Gjykatën Kushtetuese, por nuk arriti të bindte gjyqtarët e të dyja gjykatave se “1 votë e shpallur e pavlefshme, por që i takonte asaj, e bënte atë dhe jo Asim Vokshin – gjyqtare kushtetuese.”
Me ardhjen e Asim Vokshit, Gjykata Kushtetuese duhet të zgjedhë një kryetar të ri, që do zëvendësojë vendin bosh që la Holta Zaçaj. Kjo e fundit, në përfundim të mandatit të saj si gjyqtare dhe njëkohësisht si kryetare e Gjykatës Kushtetuese, ka ndarë me publikun disa reflektime mbi punën, sfidat dhe arritjet e institucionit që e drejtoi përgjatë tre viteve.
Në këtë letër “lamtumire” Zaçaj ndër të tjera shkruan: “Sa kohë mandati i gjyqtarit kushtetues është i lidhur ngushtë me pavarësinë e vetë atij sikundër edhe të kësaj Gjykate, paqartësitë në këtë drejtim ndikojnë në funksionimin sistemik të institucionit, por edhe në aspektin personal të gjyqtarëve. Në këtë drejtim mendoj se dhashë një kontribut që shkon përtej kahjes personale, pavarësisht ndonjë interpretimi të ndryshëm.”
