Një gjykatë në Peru ka dënuar ish-presidentin Martín Vizcarra me 14 vite burg, pasi e gjeti fajtor për drejtimin e një skeme korrupsioni gjatë kohës kur ai ishte guvernator i rajonit jugor të Moquegua-s. Vendimi u shpall të mërkurën dhe përfshin gjithashtu një ndalim 9-vjeçar për kandidim në poste publike, si dhe një gjobë financiare.
Vizcarra pritet të nisë menjëherë vuajtjen e dënimit, megjithëse ai njoftoi se do të apelojë vendimin, duke e cilësuar atë si të motivuar politikisht. “Kjo nuk është drejtësi, por hakmarrje. Por nuk do të më thyejnë,” shkroi ai në rrjetet sociale menjëherë pas shpalljes së vendimit.
Sipas gjykatës, Vizcarra ishte përfshirë në marrjen e njё ryshfeti me vlerë mbi 600 mijë dollarë në këmbim të dhёnies së tenderave për projekte të mëdha publike në Moquegua. Ai drejtoi rajonin nga viti 2011 deri në 2014, përpara se të zgjidhej president në vitin 2018, një post që e mbajti deri në vitin 2020. Aktualisht, ai është figurë kryesore politike në partinë Peru First.
Me këtë vendim, Vizcarra bëhet ish-presidenti i katërt peruan që përfundon në burg, çka sipas analistëve pasqyron krizën e vazhdueshme të paqёndrueshmёrisё politike dhe korrupsionit në Peru. Vendi ka pasur gjashtë presidentë që nga viti 2018, shumica të larguar si pasojë e shkarkimit ose skandaleve financiare. Të tjerë ish-udhëheqës janë ende nën hetim penal.
Vizcarra erdhi në pushtet pasi paraardhësi i tij, Pedro Pablo Kuczynski, u përball me procedurat e shkarkimit dhe dha dorëheqjen në vitin 2018 mes akuzave për tentativë blerjeje votash në Kongres dhe përfshirje në skandalin e ryshfeteve të kompanisë braziliane Odebrecht. Mandati i Vizcarrës zgjati më pak se tre vjet; ai u rrëzua nga opozita në vitin 2020 pasi ishte “i paaftё moralisht” pёr tё mbajtur funksionin, gjithashtu pёr shkak tё akuzave pёr korrupsion.
Ish-presidenti ka mohuar vazhdimisht çdo shkelje, duke e quajtur atë që po ndodh “përndjekje politike”. Ai bëri të ditur se do të vazhdojë të jetë aktiv në skenën politike, duke mbështetur vëllain e tij, Mario Vizcarra, që pritet të kandidojë në zgjedhjet presidenciale të vitit 2026.
“Kanë frikë,” shkroi ai në një deklaratë publike. “Më kanë larguar nga detyra, më kanë ndaluar të kandidoj, më kanë përjashtuar nga partia. Dhe tani po më fusin në burg. A kanë kaq shumë frikë nga Vizcarra? Votuesit do të flasin vitin e ardhshëm.”
(Pёrshtatur nga Aljazeera)
