Një ngjarje tragjike ka tronditur New Yorkun, pasi një foshnjë vetëm 7-muajshe humbi jetën teksa ndodhej në karrocë, e goditur nga një plumb qorr gjatë një sulmi të dyshuar mes bandash në Brooklyn.
Sipas autoriteteve, të shtënat ndodhën të mërkurën rreth orës 13:20, kur një automjet me dy persona iu afrua një grupi njerëzish në trotuar dhe një nga pasagjerët hapi zjarr, duke qëlluar të paktën dy herë. Plumbat kishin në shënjestër grupin, por foshnja u godit aksidentalisht, duke u bërë viktimë e pafajshme e dhunës.
Policia thekson se sulmi dyshohet të ketë lidhje me aktivitetin e bandave, ndërsa nuk raportohet për persona të tjerë të plagosur nga të shtënat.
Kryebashkiaku i qytetit, Zohran Mamdani, u shpreh i tronditur nga ngjarja, duke theksuar se “një jetë që sapo kishte nisur u shua në një çast”, ndërsa shtoi se asnjë fjalë nuk mund ta lehtësojë dhimbjen e familjes.
Pas sulmit, autorët tentuan të largoheshin, por u përplasën me një automjet tjetër vetëm disa blloqe më tej. Nga përplasja, të dy u rrëzuan në rrugë, ndërsa njëri prej tyre u plagos dhe u dërgua në spital, ku më pas u vendos në paraburgim. Personi i dytë arriti të largohej dhe vijon të jetë në kërkim nga policia.
Komisionerja e policisë, Jessica Tisch, e cilësoi ngjarjen si një tragjedi që “trondit ndërgjegjen”, duke theksuar dhimbjen e thellë që kjo humbje shkakton, veçanërisht për një familje që humbi fëmijën në mënyrë kaq të dhunshme dhe të papritur.
Ngjarja vjen në një moment kur statistikat në New York tregojnë rënie të krimit. Sipas Policisё sё New Yorkut, deri tani në vitin 2026 janë regjistruar 52 vrasje, rreth 29% më pak se në të njëjtën periudhë të një viti më parë, duke e çuar qytetin drejt një prej niveleve më të ulëta tё krimit të dekadave të fundit.
Megjithatë, kjo tragjedi rikthen vëmendjen tek realiteti i dhunës me armë, duke treguar se, pavarësisht përmirësimeve në shifra, rreziku mbetet ende i pranishëm dhe mund të godasë edhe më të pafajshmit.
(Burimi: CNN)
