Presidenti i Kolumbisë, Gustavo Petro, ka reaguar ashpër ndaj deklaratave të presidentit amerikan Donald Trump, duke i bërë një sfidë të drejtpërdrejtë Uashingtonit mes rritjes së tensioneve në Amerikën Latine pas ndërhyrjes së SHBA-së në Venezuelë.
“Ejani të më merrni. Po ju pres këtu. Mos më kërcënoni,” deklaroi Petro publikisht, duke theksuar se nuk frikësohet nga kërcënimet për ndërhyrje ushtarake amerikane në rajon. Ai shtoi se është i gatshëm të përballet me çdo akuzë apo presion që vjen nga jashtë.
Reagimi i presidentit kolumbian erdhi pasi Trump la të kuptohej se edhe Kolumbia mund të përfshihej në një ofensivë më të gjerë të SHBA-së kundër rrjeteve të dyshuara të trafikut të drogës në Amerikën Latine. Petro, një ish-guerilas dhe kritik i hershëm i ndërhyrjeve amerikane në rajon, e hodhi poshtë çdo ide për prani ushtarake të huaj në territorin kolumbian.
“Nuk pranoj pushtime, raketa apo vrasje. Pranoj vetëm informacione,” u shpreh ai, duke kërkuar “fakte dhe jo gënjeshtra”. Në të njëjtën kohë, Petro e shfrytëzoi reagimin e tij për të kritikuar ashpër korrupsionin e brendshëm, duke akuzuar atë që e quajti “mafie politike kolumbiane” për dhjetëra vite dhune dhe pabarazie ekstreme në vend.
Sipas tij, këto struktura kanë kontribuar në qindra mijëra viktima dhe e kanë kthyer Kolumbinë në një nga vendet më të pabarabarta në botë, ndërsa ndërhyrjet e huaja, sipas Petros, nuk e kanë zgjidhur problemin, por e kanë thelluar atë.
Deklaratat e forta të presidentit kolumbian vijnë vetëm pak ditë pas operacionit amerikan në Venezuelë, i cili çoi në kapjen e presidentit Nicolás Maduro dhe bashkëshortes së tij Cilia Flores, nën akuza për trafik droge dhe lidhje me rrjete kriminale.
Ngjarja ka shkaktuar reagime të shumta në rajon dhe ka rritur shqetësimet për një përshkallëzim të mëtejshëm të tensioneve mes Shteteve të Bashkuara dhe vendeve të Amerikës Latine, veçanërisht atyre të udhëhequra nga qeveri të majta.
(Burimi: Daily Mail)
