Princi dhe Princesha e Uellsit kanë ndarë me publikun fotografinë e kartolinës së tyre të Krishtlindjes, një imazh familjar i ngrohtë dhe i qetë, ku shfaqen së bashku me tre fëmijët e tyre: Princin George, Princeshën Charlotte dhe Princin Louis.
Fotoja, e publikuar nga Pallati Kensington në rrjetet sociale, përcillet me mesazhin e thjeshtë: “Ju urojmë të gjithëve Gëzuar Krishtlindjen.” Në sfond duket gjelbërimi i luleve, duke i dhënë imazhit një atmosferë pranverore, ndonëse është përdorur për sezonin festiv të dimrit.
Fotografia është realizuar në muajin prill nga fotografi Josh Shinner. I njëjti set fotografik është përdorur edhe për imazhet e publikuara më herët me rastin e ditëlindjeve të Princit George dhe Princit Louis, të cilët në foto shfaqen me të njëjtat veshje: këmisha me kuadrate, George me një jelek sportiv sipër dhe Louis me një pulovër me jakë në formë V.
Publikimi i kartolinës së Krishtlindjes është një traditë e konsoliduar për anëtarët e lartë të familjes mbretërore britanike, të cilët ndajnë me publikun imazhin që u dërgojnë miqve, familjarëve dhe bashkëpunëtorëve gjatë festave. Pak javë më parë, edhe Mbreti Charles dhe Mbretëresha Camilla publikuan kartolinën e tyre zyrtare, e realizuar me rastin e 20-vjetorit të martesës.
Kjo kartolinë vjen në një periudhë të ndjeshme për familjen mbretërore. Princesha e Uellsit ka nisur gradualisht rikthimin në detyrat publike, pasi vitin e kaluar u diagnostikua me kancer. Në shtator 2024, ajo bëri të ditur se kishte përfunduar kimioterapinë dhe se po bënte gjithçka për të qëndruar e shëndetshme.
Ndërkohë, Princi William ka pranuar së fundmi se viti 2024 ka qenë “më i vështiri” i jetës së tij.
(Burimi: CNN)
