Princi William ka nderuar trashëgiminë humanitare të nënës së tij, Diana, duke marrë pjesë në përgatitjen e drekës së Krishtlindjes për personat e pa strehë në Londër, këtë herë i shoqëruar edhe nga djali i tij i madh, Prince George, 12 vjeç. Aktiviteti u zhvillua më 20 dhjetor në selinë e organizatës bamirëse The Passage.
Kjo nuk është hera e parë për William-in: ai mori pjesë për herë të parë në këtë nismë në vitin 1993, kur ishte 11 vjeç, krah nënës së tij. Tani, trashëgimtari i fronit britanik e ka përsëritur gjestin me të birin, duke e përfshirë në një traditë që përfaqëson vlerat e dhembshurisë dhe angazhimit social. Në pamjet e publikuara në rrjetet sociale të Princave të Uellsit, shihen baba e bir duke dekoruar ambientet festive, duke bashkëbiseduar me njerёzit dhe duke ndihmuar në kuzhinë.
“Nder të bashkohemi me vullnetarët dhe stafin e The Passage për të përgatitur drekën e Krishtlindjes – këtë vit me një palë duar ndihme shtesë!”, shkruhej në një postim zyrtar. Dy vitet e fundit, William kishte marrë pjesë i vetëm në përgatitjet e kësaj dreke.
Sipas organizatës, princi ka theksuar se vizitat e tij në qendër gjatë adoleshencës i lanë një përshtypje të thellë për rëndësinë e trajtimit me dinjitet, respekt dhe mirësi të të gjithë njerëzve, veçanërisht të atyre më në nevojë. Që prej vitit 2019, William është kujdestari mbretëror i The Passage dhe ndihma për personat e pa strehë është një nga shtyllat kryesore të veprimtarisë së tij filantropike.
Në vitin 2023, ai nisi programin pesëvjeçar Homewards, me synimin për të luftuar fenomenin e të pastrehëve në Mbretërinë e Bashkuar, i dokumentuar më pas në serinë “Prince William: We Can End Homelessness” (2024). Kjo kauzë shihet gjerësisht si një homazh i drejtpërdrejtë për Diana-n, e cila humbi jetën 28 vite më parë.
Pjesëmarrja e Princit George shënon gjithashtu një hap të ri në angazhimet e tij publike, në një moshë ku protokollet mbretërore nisin ta përgatisin për një rol më të dukshëm.
(Burimi: El País)
