Një udhëzim i ri i publikuar në Fletoren Zyrtare, me nr. 3, datë 4 mars 2026, përcakton se cilat programe të formimit profesional do të përfitojnë mbështetje financiare nga shteti gjatë këtij viti. Udhëzimi është miratuar nga ministrja e Ekonomisë dhe Inovacionit, Delina Ibrahimaj, dhe synon të orientojë fondet publike drejt profesioneve që konsiderohen me kërkesë të lartë në tregun e punës.
Sipas dokumentit, për vitin 2026 mbështetja financiare e shtetit për kurset e formimit profesional do të përqendrohet në dy fusha kryesore: programimi dhe industria kulturore dhe kreative. Kjo do të thotë se institucionet publike dhe private të formimit profesional që ofrojnë kurse në këto sektorë mund të përfitojnë financim nga programet shtetërore të nxitjes së punësimit.
Në fushën e programimit, udhëzimi përfshin një gamë të gjerë aftësish dhe specializimesh që lidhen me ekonominë digjitale. Mes tyre përmenden kodimi, zhvillimi i aplikacioneve, robotika, elektronika, shkenca e të dhënave, siguria kibernetike, inteligjenca artificiale, testimi dhe dizajni i software-ve, dizajni i faqeve web, dizajni i përvojës dhe ndërfaqes së përdoruesit, mësimi makinerik, realiteti virtual dhe ai i shtuar, si edhe algoritmet kompjuterike.
Ndërkohë, fusha e dytë që do të mbështetet financiarisht është industria kulturore dhe kreative, e cila lidhet kryesisht me sektorin e prodhimit audioviziv dhe industrinë e medias dhe artit. Në këtë kategori përfshihen profesione si departamenti artistik, kamera dhe kinematografia, kostumografia, ndriçimi dhe pajisjet teknike, tekniku i zërit dhe pas-produksioni, efektet vizuale dhe speciale, produksioni dhe regjia, rekvizitat dhe dekorimi i setit, si edhe marketingu dhe promovimi.
Fondet për zbatimin e këtyre programeve do të mbulohen nga programi i nxitjes së punësimit, ndërsa zbatimi i udhëzimit i është ngarkuar Agjencisë Kombëtare të Punësimit dhe Aftësive.
Në thelb, një udhëzim i tillë tregon orientimin e politikave publike drejt profesioneve që konsiderohen strategjike për ekonominë e ardhshme. Programimi lidhet me transformimin digjital të ekonomisë dhe kërkesën në rritje për specialistë të teknologjisë, ndërsa industria kreative përfaqëson një sektor në zgjerim që përfshin prodhimin filmik, median, artin dhe marketingun modern.
Mbështetja financiare e shtetit për këto dy fusha sugjeron se politikat e formimit profesional po përpiqen të përshtaten me ndryshimet e tregut të punës, ku aftësitë digjitale dhe profesionet kreative po fitojnë gjithnjë e më shumë peshë.
Në këtë kontekst, zgjedhja e këtyre dy sektorëve si prioritet për vitin 2026 shihet si një sinjal për drejtimin që mund të marrë tregu i profesioneve në vitet e ardhshme, ku ekonomia digjitale dhe industria kreative pritet të jenë ndër burimet kryesore të punësimit të ri.
Se sa do ta ndjekë tregu këtë orientim mbetet për t’u parë, por për momentin duket se mes Delinës reale dhe “Diellës” virtuale, qeveria po përpiqet të tregojë se ku lind dielli i profesioneve të së ardhmes.
