Këtë të premte, në orën 17:00, sheshi “Skënderbej” do të bëhet qendra e thirrjeve për drejtësi ndaj ish-drejtuesve të Ushtrisë Çlirimtare të Kosovës, që vazhdojnë të mbahen në paraburgimin e Hagës.
Drejtuesi i Organizatës së Veteranëve të Luftës së UÇK-së, Hysni Gucati, në një konferencë për shtyp, tha se përgatitjet për këtë protestë kanë nisur që prej tre muajsh, ndërsa kujtoi se më 7 gusht të këtij viti është zhvilluar një tjetër protestë e madhe, si dhe një tjetër në Hagë, në Holandë.
“Organizimi ynë ka filluar që prej tre muajsh. Ne kemi bërë një protestë të vështirë më 7 gusht të këtij viti. Një protestë ka qenë edhe në Hagë të Holandës. Protesta ndërkombëtare në Tiranë ka një arsye të veçantë, sepse ne jemi një komb, një gjuhë, një kulturë, një flamur. Mendoj se gjeneza jonë është në Tiranë, në vitet ‘90, dhe kjo është arsyeja pse ne donim që protesta ndërkombëtare të zhvillohej në Shqipëri”, – deklaroi Gucati.
Protesta pritet të mbledhë veteranë të luftës dhe qytetarë nga të gjitha trojet shqiptare, ndërsa organizatorët e kanë cilësuar atë si një manifestim paqësor për të kërkuar drejtësi për drejtuesit e UÇK-së në Hagë.
Drejtuesi i Organizatës së Veteranëve të Luftës së UÇK-së, Gucati, deklaroi për “Klan News” se 60 mjete do të vijnë nga Kosova për të marrë pjesë në këtë tubim me karakter kombëtar.
Gucati theksoi se “edhe kryetarë komunash në Kosovë kanë angazhuar autobusë për të mbështetur protestën në Tiranë”. Ai kujtoi se “protesta e parë u zhvillua në Prishtinë, më pas në Holandë dhe tani radha është për kryeqytetin shqiptar”.
Në tubim do të flasë edhe Ali Ahmeti, një i afërm i një dëshmori nga Shqipëria, si dhe ish-presidenti Alfred Moisiu, i cili ka pranuar të marrë fjalën në sheshin “Skënderbej”.
Ndërsa, kritikoi mungesën e mbështetjes nga qeveria e Kosovës dhe Albin Kurti, Gucati theksoi se “qeveria e Kosovës nuk po formohet, por shpreson që në fund të ketë një rezolutë të përbashkët për këtë çështje nga Parlamenti i Shqipërisë dhe i Kosovës”.
Ai denoncoi edhe mbajtjen në paraburgim prej pesë vitesh të krerëve të UÇK-së, duke e quajtur këtë “një situatë absurde” dhe një “proces politik nga gjykata”.
Ndërkaq, në një deklaratë publike shoqata “Tirana” dhe Organizata e Veteranëve të Luftës së UÇK-së shprehen se protesta mbahet si thirrje për unitet kombëtar dhe për drejtësi ndërkombëtare. “Kjo protestë vjen si thirrje për unitet kombëtar dhe drejtësi ndërkombëtare, në mbrojtje të luftës të drejtë të UÇK-së, e cila i dha fund një regjimi gjenocidal dhe solli lirinë, që gëzojmë sot”, – thuhet në deklaratë.
