Angli/ Një vajzë 24-vjeçare ka rrëfyer në mënyrë anonime se është përfshirë sërish me ish-partnerin e saj, vite pasi lidhja e tyre përfundoi në mënyrë të dhimbshme për shkak të tradhtisë së tij. Edhe pse ajo e përshkruan marrëdhënien aktuale si “pa angazhime dhe pa ndjenja”, situata po i shkakton shqetësim emocional dhe ndjenjë faji.
Ajo dhe ish-i i saj, 27 vjeç, kishin qenë bashkë për tre vite dhe ajo besonte se lidhja e tyre do të përfundonte me martesë. Gjithçka u shkatërrua kur ajo e kapi atë me një grua tjetër. Përballja ishte e ftohtë dhe poshtëruese, dhe ndarja e la vajzën në gjendje të rëndë emocionale për muaj të tërë.
Pas një periudhe të gjatë rikuperimi, ajo arriti të ecte përpara me jetën e saj. Por gjithçka ndryshoi kur, gjatë një mbrëmjeje me miqtë, u ndesh rastësisht me ish-partnerin. Një bisedë e thjeshtë, një gotë dhe nostalgjia e vjetër mjaftuan që situata të përshkallëzohej.
Që nga ajo natë, ata janë takuar disa herë, vetëm për marrëdhënie fizike. Ajo thekson se nuk ka asnjë dëshirë për t’u rikthyer në lidhje dhe se edhe ai e kupton këtë. Megjithatë, ndjen një ngërç të brendshëm, sidomos sepse familja dhe miqtë e saj e përçmojnë ish-in për mënyrën si e ka trajtuar në të kaluarën.
Ekspertët e marrëdhënieve në çift paralajmërojnë se rikthimi intim me një ish-partner, veçanërisht me dikë që ka shkaktuar dhimbje të madhe emocionale, shpesh hap plagë të vjetra. Edhe kur duket si një marrëveshje “pa pasoja”, rreziku i lëndimit emocional mbetet i lartë.
Sipas këshillave profesionale, për të ecur përpara dhe për të ndërtuar marrëdhënie më të shëndetshme, është e nevojshme të ndërpriten lidhjet që e mbajnë një person të lidhur me të kaluarën. Mbështetja te miqtë, ruajtja e vetërespektit dhe vendosja e kufijve të qartë janë hapa thelbësorë për shërimin emocional.
Në fund, pyetja që i duhet bёrё vetes nё njё situatё tё tillё mbetet: a është vërtet ky një kompromis i padëmshëm, apo thjesht një mënyrë për të shtyrë dhimbjen e pashëruar?
(Burimi: THE SUN)
