Presidenti rus Vladimir Putin është shprehur se Rusia nuk do të ndërmarrë më luftëra pas konfliktit në Ukrainë, nëse Perëndimi e trajton Moskën “me respekt” dhe merr parasysh interesat e saj. Ai i cilësoi si “të pakuptimta” pretendimet se Rusia po planifikon sulme të reja ndaj vendeve evropiane.
Deklaratat u bënë gjatë maratonës tradicionale televizive të fundvitit “Linja Direkte”, e cila zgjati pothuajse katër orë e gjysmë dhe kombinoi pyetje nga qytetarë dhe gazetarë nga e gjithë Rusia. I pyetur nga gazetari i BBC-së Steve Rosenberg nëse Rusia do të ndërmarrë “operacione të reja ushtarake speciale” – termi që Putini përdor për pushtimin e Ukrainës – presidenti rus u përgjigj se kjo nuk do të ndodhë nëse Rusia trajtohet me respekt dhe nëse, sipas tij, Perëndimi respekton interesat ruse.
Putini shtoi gjithashtu se nuk do të ketë pushtime të tjera ruse “nëse nuk na mashtroni siç na mashtruat me zgjerimin e NATO-s drejt lindjes”. Ai përsëriti akuzën e tij të kahershme se Perëndimi kishte shkelur një premtim të supozuar të vitit 1990 ndaj udhëheqësit sovjetik Mikhail Gorbachev për moszgjerimin e NATO-s, një pretendim që vetë Gorbachev e ka mohuar më vonë.
Maratona televizive u zhvillua në një sallë në Moskë, ku Putini qëndronte përballë një harte gjigante të Rusisë që përfshinte edhe territoret e pushtuara të Ukrainës, përfshirë Krimenë, të cilën Rusia e aneksoi në vitin 2014. Televizioni shtetëror rus njoftoi se gjatë transmetimit ishin paraqitur mbi tre milionë pyetje.
Vetëm disa orë pas përfundimit të ngjarjes, autoritetet ukrainase njoftuan se shtatë persona u vranë dhe 15 të tjerë u plagosën nga një sulm me raketa ruse në rajonin jugor të Odesës, duke nënvizuar kontrastin mes deklaratave për paqe dhe realitetit në terren. Pushtimi i plotë i Ukrainës nga Rusia nisi në shkurt të vitit 2022.
Edhe pse ngjarja ishte kryesisht e koreografuar, në ekranin gjigant u shfaqën edhe disa komente kritike nga publiku, përfshirë ankesa për ndërprerjet e internetit, cilësinë e ujit të rubinetit dhe një mesazh që e quante “Linjën Direkte” një “cirk”. Autoritetet ruse kanë fajësuar sulmet me dronë ukrainasë për ndërprerjet e internetit celular.
Putini iu përgjigj gjithashtu pyetjeve mbi ekonominë ruse, e cila po përballet me rritje çmimesh, ngadalësim të rritjes dhe rritje të TVSH-së nga 20 në 22 për qind që nga 1 janari. Gjatë transmetimit, banka qendrore ruse njoftoi uljen e normës bazë të interesit në 16 për qind, një lëvizje që Kremlini e paraqiti si dëshmi të qëndrueshmërisë ekonomike.
Sa i përket luftës në Ukrainë, Putini deklaroi sërish se është “i gatshëm dhe i vullnetshëm” për t’i dhënë fund konfliktit “në mënyrë paqësore”, por pa dhënë shenja kompromisi. Ai përsëriti kërkesat e shpallura në qershor 2024, sipas të cilave forcat ukrainase duhet të tërhiqen nga katër rajone të pushtuara pjesërisht nga Rusia dhe Kievi të heqë dorë nga synimi për t’u anëtarësuar në NATO.
Kërkesa kryesore e Moskës mbetet kontrolli i plotë i Donbasit në lindje të Ukrainës, përfshirë pjesë të konsiderueshme të rajonit të Donetskut, territore që Rusia ende nuk ka arritur t’i pushtojë plotësisht.
(Burimi: BBC)
