Nën presionin financiar në rritje, Rusia ka nisur për herë të parë pas gati 25 vitesh shitjen e rezervave të arit nga banka e saj qendrore – një lëvizje që tregon qartë se kostot e luftës dhe sanksionet po rëndojnë gjithnjë e më shumë mbi ekonominë ruse.
Sipas të dhënave zyrtare, të cituara nga The Moscow Times, Rusia ka shitur rreth 300 mijë ons ar në janar 2026 dhe 200 mijë ons të tjera në shkurt. Në total, bëhet fjalë për rreth 14 ton ar – niveli më i lartë i shitjeve që nga viti 2002.
Kjo ka sjellë edhe rënien e rezervave totale të arit në 74.3 milionë ons, niveli më i ulët në katër vitet e fundit. Ndryshe nga e kaluara, kur ari përdorej kryesisht për operacione të brendshme apo për prodhimin e monedhave, këtë herë autoritetet ruse kanë shitur drejtpërdrejt ar fizik, një sinjal i qartë ndryshimi në politikën ekonomike.
Pas kësaj lëvizjeje qëndron një realitet i vështirë financiar. Defiҫiti buxhetor i Rusisë ka kaluar mbi 15 trilionë rubla në periudhën 2022–2025, ndërsa vetëm në dy muajt e parë të vitit 2026 janë shtuar edhe 3.5 trilionë rubla të tjera. Analistët e lidhin këtë situatë me kostot e larta të luftës dhe efektet e sanksioneve ndërkombëtare.
Një faktor kyç mbetet edhe bllokimi i rreth 300 miliardë dollarëve asete ruse jashtë vendit, si pjesë e sanksioneve perëndimore. Kjo ka kufizuar ndjeshëm aftësinë e Bankës Qendrore për të përdorur rezervat valutore në mbështetje të ekonomisë dhe të rubles.
Sipas ekonomistëve, shitja e arit mund të jetë një përpjekje për të ruajtur rezervat e mbetura në valuta të aksesueshme, si juani kinez, që mund të përdoren për stabilizimin e monedhës dhe për financimin e nevojave të shtetit.
Kjo lëvizje shihet si një tregues i qartë se, pavarësisht retorikës zyrtare, presioni ekonomik ndaj Rusisë po thellohet dhe po detyron autoritetet të përdorin edhe “rezervat e fundit” për të mbajtur në këmbë financat e vendit.
