Të rinjtë sot po hyjnë gjithnjë e më vonë në marrëdhënie romantike – dhe sipas studiuesve, ky nuk është thjesht një ndryshim social, por një faktor që mund të ndikojë drejtpërdrejt në mirëqenien e tyre mendore dhe fizike.
Sondazhet në SHBA tregojnë se brezi Gen Z ka shumë më pak përvojë në marrëdhënie krahasuar me brezat e mëparshëm. Një studim i vitit 2023 zbuloi se përqindja e të rinjve që kanë qenë ndonjëherë në një lidhje gjatë adoleshencës është rreth 20% më e ulët se te Gen X dhe Baby Boomers. Ndërsa një tjetër studim i vitit 2025 raportoi se mbi 40% e meshkujve Gen Z nuk kanë pasur asnjë lidhje romantike gjatë viteve të adoleshencës.
Një sondazh kombëtar me 20 mijë persona e cilësoi Gen Z si “brezi më i vetmuar” deri tani.
Një analizë e re nga Universiteti i Zyrihut, bazuar në të dhënat e mbi 17 mijë të rinjve nga Gjermania dhe Mbretëria e Bashkuar, tregon se personat që mbeten single për një kohë të gjatë përjetojnë rritje të ndjenjës së vetmisë dhe ulje të kënaqësisë nga jeta. Efekti bëhet më i dukshëm në fund të të njëzetave – një periudhë ku rriten edhe simptomat e ankthit dhe depresionit.
“Qëndrimi single për një periudhë të zgjatur në moshë të re shoqërohet me rreziqe të moderuara për mirëqenien,” shpjegon studiuesi Michael Krämer.
Studimi zbuloi gjithashtu se meshkujt, personat me nivel të lartë arsimor, ata që jetojnë vetëm ose me prindërit, si edhe ata me mirëqenie më të ulët emocionale, kanë më shumë gjasa të mbeten pa lidhje për një kohë të gjatë. Një nga arsyet kryesore lidhet me fokusin në arsim dhe karrierë, që shpesh shtyn formimin e marrëdhënieve serioze.
Nga ana tjetër, hyrja në lidhjen e parë rezulton të ketë ndikim pozitiv. Të rinjtë që përjetojnë marrëdhënien e parë raportojnë më shumë kënaqësi nga jeta dhe më pak ndjenjë vetmie – si në afat të shkurtër, ashtu edhe në afat të gjatë. Por sa më vonë të ndodhë lidhja e parë, aq më e vështirë bëhet krijimi i saj.
Ekspertët theksojnë se vetmia e zgjatur nuk është vetëm një gjendje emocionale, por lidhet edhe me pasoja fizike. Studime të mëparshme tregojnë se vetmia rrit nivelin e stresit në trup dhe shoqërohet me rreziqe për sistemin imunitar, zemrën dhe shëndetin e përgjithshëm.
Sipas kёtyre studimeve, ndërsa pavarësia personale është e rëndësishme, izolimi i gjatë social dhe emocional në moshë të re mund të ketë kosto reale për shëndetin.
(Burimi: The Independent)
