Kryeministri Edi Rama ka ashpërsuar tonet ndaj sistemit të drejtësisë, duke reaguar për vendimin e Gjykatës Kushtetuese që la në fuqi pezullimin nga detyra të zëvendëskryeministres Belinda Balluku. Në podcastin e tij “Flasim”, kreu i qeverisë jo vetëm konfirmoi se nuk do të tërhiqet nga mbrojtja politike e saj, por artikuloi një përplasje të hapur me prokurorët dhe gjykatat, të cilat i akuzoi për tejkalim kompetencash.
Rama e cilësoi situatën një precedent të paprecedentë, duke deklaruar se Shqipëria është bërë “shembulli i parë i një budallallëku botëror”. Sipas tij, pezullimi i një anëtari të qeverisë pa nisur ende gjyqi përbën një ndërhyrje të rrezikshme në pushtetin ekzekutiv.
“Nuk e ka gjetur dot forcën për të mos e lejuar rimarrjen peng të qeverisë së Shqipërisë me një mjet të paparë dhe të padëgjuar në botën demokratike,” tha ai, duke shtuar se Gjykata Kushtetuese “u mbyt në ujin e turbullt” të arsyes dhe mosarsyes.
Thelbi i qëndrimit të Ramës është i qartë: pezullimi i Ballukut – për të cilën ai vazhdon pёrsёrit se nuk akuzohet për korrupsion – është një “shpikje 100% Made in Albania” e një drejtësie që e konsideron ende të papjekur. Kryeministri paralajmëroi se zhbërja e këtij precedenti është e domosdoshme për të garantuar, sipas tij, pavarësinë e ekzekutivit dhe të parlamentit nga pushteti gjyqësor.
Ai shkoi edhe më tej, duke thёnё se, nëse ky standard pranohet, “edhe Presidenti i Republikës mund të pezullohet nga i pari prokuror që gdhihet me këtë ide në kokë”.
Por deklaratat e Ramës nuk u ndalën vetëm te rasti Balluku. Kryeministri sulmoi ashpër atë që e quajti fenomen të “arresteve pa gjyq”, duke përmendur rastin e Durrësit me mbi 30 urdhër-arreste, të cilat – sipas tij – nuk përmbushnin kriteret e domosdoshme të drejtësisë demokratike.
Mes rreshtave, mesazhi politik duket edhe më i gjerë: Rama sinjalizon se është i gatshëm të përballet me çdo prokuror apo strukturë hetimore që, sipas tij, po shndërrohet në faktor destabilizues për qeverisjen. Kjo përplasje retorike vjen në një moment kur drejtësia ka intensifikuar hetimet në disa çështje të ndjeshme, duke përfshirë edhe ato me ndikim të madh publik.
Në fjalën e tij, kryeministri e paraqiti shumicën qeverisëse si garanten e vetme të luftës për drejtësi dhe shtet ligjor, duke deklaruar: “Kush mendon se kjo përpjekje do të prodhojë kosto për këtë shumicë gabon, sepse nuk kupton që lufta për drejtësi, për shtet ligjor demokratik dhe për Shqipërinë në BE ka vetëm një garant: mua dhe këtë shumicë qeverisëse.”
Një gjë del edhe mё qartë nga fjala e Ramës: beteja me drejtësinë nuk duket se do të zbutet. Përkundrazi, ajo po hyn në një fazë më të drejtpërdrejtë, ku kryeministri shfaqet i vendosur të mbrojë bashkëpunëtorët e tij dhe të sfidojë publikisht çdo vendimmarrje që e konsideron të padrejtë.
Në fund, mbetet për t’u parë se çfarë mjeti real i mbetet në dorë kryeministrit përballë një drejtësie që tashmë duket se nuk e kontrollon dot politikisht, tё paktёn jo tё gjithёn: një “reformim i reformës” në drejtësi – pikërisht asaj reforme për të cilën qeveria është mburrur për një dekadë si model suksesi dhe shembull për t’u ndjekur edhe nga vende të tjera. Ku i dihet, ndoshta përplasja e sotme është paralajmërimi i një kapitulli të ri.
