Influencerja dhe biznesmenja e njohur britanike, Molly-Mae Hague, ka folur hapur për përvojën e saj si nënë e re dhe dilemat që e kanë shoqëruar që nga lindja e vajzës së saj, Bambi, dy vjet më parë. Në një intervistë për Cosmopolitan, ish-ylli i “Love Island”, sot 26 vjeçe, pranoi se ndonëse nuk është penduar për krijimin e familjes në moshë të re, ndoshta do të kishte qenë më mirë të kishte pritur disa vite të tjera.
Ajo tha se në moshën 23-vjeçare ndiente se kishte përjetuar shumë dhe ishte gati për një kapitull të ri me partnerin e saj, Tommy Fury, por me kalimin e kohës ka kuptuar se përgjegjësitë e mëmësisë janë më të mëdha sesa kishte menduar. “Ndonjëherë mendoj se do të kisha dashur më shumë ditë për të mos bërë asgjë, sepse ato më ndihmonin shumë për shëndetin mendor,” – tha ajo, duke iu referuar mungesës së qetësisë që ndjen çdo prind i ri.
Molly-Mae tregoi gjithashtu se ndien një presion të fortë për të pasur një fëmijë të dytë, pasi dëshiron që Bambi të ketë një vëlla ose motër, ashtu si ajo vetë ka një lidhje të ngushtë me motrën e saj, Zoe. Megjithatë, ajo theksoi se nuk do ta bënte vetëm për hir të vajzës, por vetëm nëse do ta ndiente veten gati.
Në intervistë, themeluesja e markës Maebe dhe e linjës së produkteve Filter foli edhe për vështirësitë e mëmësisë, duke pranuar se preferon periudhën kur vajza e saj ishte foshnje, krahasimisht me periudhёn e tanishme, sepse komunikimi dhe marrëdhënia janë më të lehta. Ajo përshkroi Bambi-n si një vajzë me “personalitet të fortë”, “shumë të vendosur” dhe me “shije të qarta”, duke shtuar me krenari se vajza e saj është “plot humor dhe di saktësisht çfarë do.”
Molly-Mae, që sot ka një pasuri të vlerësuar në mbi 6 milionë paund, u shpreh se çdo ditë mëson diçka të re nga mëmësia, por edhe se ajo përballon dilema që shumë nëna të reja i ndiejnë – midis dëshirës për të qenë prind i përkushtuar dhe nevojës për të ruajtur vetveten. “
Në këtë reflektim të sinqertë, Molly-Mae jo vetëm që rrëfen sfidat personale, por ngre edhe një diskutim më të gjerë për pritshmëritë që shoqëria vendos mbi nënat e reja – një mesazh që përkon me shumë gra që përpiqen të gjejnë ekuilibrin mes karrierës, mëmësisë dhe kujdesit pёr veten.
(Burimi: The Sun)
