Pas suksesit të jashtëzakonshëm të It Ends With Us, autorja bestseller Colleen Hoover rikthehet me një tjetër histori të thellë dhe emocionale që tashmë po shndërrohet në film: “Reminders of Him”, një dramë prekëse mbi dashurinë, faljen dhe mundësinë e një fillimi të dytë në jetë. Filmi do të shfaqet ekskluzivisht në kinematë botërore më 13 mars 2026, nga Universal Pictures.
Në qendër të historisë është Kenna Rowan (e interpretuar nga Maika Monroe), një grua e re që pas një gabimi tragjik përfundon në burg dhe humbet gjithçka — përfshirë mundësinë për të rritur vajzën e saj të sapolindur, Diem. Pas shtatë vitesh, ajo kthehet në qytetin e saj të vogël në Wyoming me shpresën për të rindërtuar jetën dhe për të fituar të drejtën për të parë vajzën që kurrë nuk e ka njohur.
Por rruga drejt pajtimit nuk është e lehtë. Prindërit kujdestarë të Diem-it, Grace dhe Patrick (interpretuar nga Lauren Graham dhe Bradley Whitford), e refuzojnë kategorikisht praninë e Kennës. Në mes të dhimbjes dhe pengut, ajo gjen mbështetje të papritur tek Ledger Ward (Tyriq Withers) — një ish-lojtar i NFL dhe pronar i një bari lokal, që shpejt bëhet më shumë sesa një mik. Ndërsa lidhja e tyre sekrete thellohet, ajo sjell me vete rreziqe, emocione të forta dhe një dilemë mes dashurisë dhe përgjegjësisë.
Senari është shkruar nga vetë Colleen Hoover në bashkëpunim me Lauren Levine. Prodhimi është rezultat i bashkëpunimit midis Heartbones Entertainment dhe Little Engine Productions, me producentet Hoover, Levine dhe Gina Matthews, dhe muzikë origjinale nga Danny Elfman.
Botuar për herë të parë në vitin 2022, romani Reminders of Him ka shitur mbi 6 milionë kopje në SHBA dhe është përkthyer në 45 gjuhë. Filmi pritet të jetë një nga dramat romantike më të forta të vitit 2026, duke ruajtur ndjeshmërinë që e ka bërë Colleen Hoover një fenomen botëror të letërsisë bashkëkohore.
