Sipas njoftimeve zyrtare të Agjencisë Kombëtare të Mbrojtjes Civile, situata e krijuar nga reshjet intensive të orëve të fundit ka sjellë rritje të ndjeshme të niveleve të lumenjve dhe problematika serioze në disa qarqe të vendit, duke përfshirë përmbytje të banesave dhe tokave bujqësore, rrëshqitje dherash, dëmtime infrastrukturore dhe bllokime rrugësh.
Autoritetet bëjnë me dije se qarqet më të prekura janë Shkodra, Lezha, Durrësi, Vlora, Fieri, Berati dhe Gjirokastra, ndërsa në qarqet e tjera situata po monitorohet në mënyrë të vazhdueshme dhe aktualisht nuk paraqet rrezik të menjëhershëm.
Si pasojë e rrezikut për jetën dhe shëndetin e qytetarëve, AKMC njofton se është urdhëruar evakuimi i menjëhershëm i banorëve në Bashkinë Durrës, konkretisht në njësitë administrative Sukth dhe Katund i Ri, si dhe në Bashkinë Vlorë, në Njësinë Administrative Novoselë.
Evakuimet po kryhen në bashkëpunim me prefekturat përkatëse, bashkitë dhe strukturat vendore të emergjencave civile, ndërsa transporti po sigurohet nga mjetet e bashkive, Shërbimi i Mbrojtjes nga Zjarri dhe Shpëtimi dhe Forcat e Armatosura. Prioritet në këtë proces kanë fëmijët, të moshuarit, personat me aftësi të kufizuara dhe familjet në zona të izoluara.
Në qarkun Shkodër raportohet rritje e nivelit të ujit në disa zona, përfshirë Obotin, Vaun e Dejës dhe Malësinë e Madhe, ku ka banesa të rrethuara nga uji dhe rrugë të bllokuara.
Në Lezhë, mijëra hektarë tokë bujqësore janë përmbytur dhe dhjetëra banesa ndodhen të izoluara, ndërkohë që po punohet për riparimin e argjinaturave të dëmtuara.
Brenda në Durrës, ndonëse situata paraqitet drejt përmirësimit, vijon puna për largimin e ujit nga qindra banesa dhe objekte, ndërsa qindra qytetarë janë strehuar në ambiente të përkohshme.
Në Vlorë, niveli i lumit Vjosë në zonën e Novoselës ka kaluar kuotat e sigurisë, duke detyruar evakuimin e familjeve pranë Urës së Mifolit dhe në vetë Novoselën. Probleme të ngjashme janë raportuar edhe në Krujë, Shijak, Fier, Berat dhe Gjirokastër, ku reshjet kanë shkaktuar përmbytje, rrëshqitje dherash dhe vështirësi në qarkullim.
Sipas AKMC-së, në terren janë angazhuar qindra efektivë të Forcave të Armatosura, mjete të rënda, gomone shpëtimi dhe pompa thithëse, me fokus evakuimin e banorëve, përforcimin e argjinaturave dhe minimizimin e dëmeve.
Autoritetet u bëjnë thirrje qytetarëve të ndjekin udhëzimet zyrtare, të shmangin lëvizjet e panevojshme dhe të raportojnë çdo situatë rreziku pranë strukturave përgjegjëse, ndërsa situata vijon të monitorohet në mënyrë të pandërprerë.
