Teatri Kombëtar i Operës, Baletit dhe Ansamblit Popullor do të sjellë për publikun shqiptar një nga kryeveprat e komedisë lirike, “L’Elisir d’Amore” të Gaetano Donizettit, në një produksion të ri që premton emocione, humor dhe interpretim të nivelit të lartë artistik. Vepra rikthehet e plotë në skenë pas 14 vitesh, duke e bërë këtë produksion një nga ngjarjet kulturore më të rëndësishme të sezonit.
Opera bashkon në skenë emra të spikatur të artit shqiptar dhe ndërkombëtar, të ndarë në dy kaste interpretësh, duke krijuar një mozaik zërash dhe temperamentesh artistike. Mes tyre bien në sy sopranoja Enkeleda Kamani dhe baritoni Gëzim Myshketa, artistë që kanë ndërtuar një karrierë të rëndësishme edhe në skenat ndërkombëtare.
Në rolin e Adinës do të alternohen Enkeleda Kamani dhe Nina Muho, ndërsa personazhi i Nemorinos do të vijë përmes interpretimit të Galeano Salas dhe Matteo Mezzaro. Belcore do të interpretohet nga Davide Luciano dhe Artur Vera, ndërsa rolin plot humor të Doktor Dulcamarës do ta sjellin Gëzim Myshketa dhe Matteo D’Apolito. Gianetta do të marrë jetë nga Ana Tafani dhe Greis Shametaj, duke kompletuar atmosferën e gjallë të kësaj opere.
Produksioni mban firmën regjisoriale të Riccardo Canessas, me skenografi dhe kostume nga Alfredo Troisi, ndërsa Kori dhe Orkestra e TKOBAP-së do të drejtohen nga maestro Jacopo Brusa, duke sjellë freskinë dhe dritën e muzikës së Donizettit.
Shfaqjet do të mbahen më 11, 12, 13 dhe 14 shkurt, në orën 19:00.
Biletat janë tashmë në shitje pranë biletarisë së TKOBAP-së, çdo ditë nga ora 10:00–14:00 dhe 16:00–20:00, ndërsa ditën e shfaqjes deri në orën 18:30.
Një komedi romantike plot jetë, muzikë të paharrueshme dhe interpretime elegante — një zgjedhje ideale për këdo që kërkon një mbrëmje ndryshe në kryeqytet.
