Rregulli i ashtuquajtur “3-6-9” sugjeron që, kur bëhet fjalë për marrëdhënie romantike, është e rëndësishme t’i kushtohet vëmendje kohës që kalon. Nuk bëhet fjalë për një ligj të prerë apo një formulë që vlen për të gjithë, por për një udhëzues të përgjithshëm që ndihmon të kuptohet kur është shumë herët për vendime të mëdha dhe kur mund të jetë tepër vonë për të vazhduar një lidhje që nuk funksionon.
Tre muajt e parë të një marrëdhënieje shpesh përshkruhen si “faza e muajve të mjaltit”. Në këtë periudhë, emocionet janë të forta, gjithçka duket më e bukur se sa është në të vërtetë dhe gjykimi mund të ndikohet nga entuziazmi dhe tërheqja fizike. Pikërisht për këtë arsye, kjo fazë nuk konsiderohet e përshtatshme për angazhime afatgjata, sepse ende nuk e njihni mjaftueshëm personin tjetër dhe zakonisht nuk keni përjetuar konflikte serioze.
Pas muajit të tretë, zakonisht mes muajit të katërt dhe të gjashtë, fillon ajo që quhet faza e konfliktit. Në këtë periudhë, dallimet bëhen më të dukshme dhe sjellje që më parë dukeshin të parëndësishme, mund të fillojnë të tё bezdisin. Në të njëjtën kohë, maskat bien dhe secili tregon më shumë se kush është në të vërtetë. Konfliktet nuk janë domosdoshmërisht negative; përkundrazi, ato shërbejnë si provë për të kuptuar nëse dhe si dy persona arrijnë të zgjidhin problemet, të komunikojnë dhe të mbështesin njëri-tjetrin në situata të vështira.
Rreth muajit të shtatë deri në të nëntin, sipas këtij rregulli, vjen faza e vendimmarrjes. Në këtë pikë, supozohet se keni përjetuar mjaftueshëm situata dhe keni mbledhur informacion të mjaftueshëm për të vendosur nëse marrëdhënia ka potencial për të vazhduar në afatgjatë apo nëse është më e shëndetshme të mbyllet. Ideja është që të mos qëndroni në një lidhje thjesht nga zakoni, frika ose inercia, por as të mos merrni vendime madhore shumë herët.
Rregulli 3-6-9 duhet parë si një orientim fleksibël dhe jo si një afat strikt. Çdo marrëdhënie ka ritmin e vet dhe fazat mund të zgjasin më shumë ose më pak, në varësi të njerëzve dhe rrethanave. Megjithatë, ky parim mund të ndihmojë për të shmangur dy gabime të zakonshme: angazhimin e nxituar dhe humbjen e kohës në një marrëdhënie që nuk të përshtatet. Në fund, koha është një nga pasuritë më të çmuara dhe vëmendja ndaj saj mund të bëjë diferencën mes një lidhjeje të shëndetshme dhe një zhgënjimi të zgjatur.
(Burimi: Përkthyer dhe përshtatur nga artikulli “How to Use the 3-6-9 Rule for a Relationship” nga Bruce Y. Lee, Psychology Today)
