Aksi rrugor Librazhd–Përrenjas vijon të mbetet i bllokuar për shkak të rrëshqitjeve masive të tokës në zonën e njohur si “Arrat e Gurrës”, pjesë e segmentit Librazhd–Pogradec. Autoriteti Rrugor Shqiptar (ARRSH) njofton se terreni paraqitet i paqëndrueshëm, duke e bërë të pamundur dhe të pasigurt qarkullimin për mjetet dhe këmbësorët.
Sipas ARRSH, në terren po kryhet një rivlerësim urgjent gjeologjik dhe teknik për të përcaktuar ndërhyrjet e nevojshme për stabilizimin e zonës dhe rikthimin e qarkullimit në kushte sigurie.
Deri në normalizimin e situatës, drejtuesit e automjeteve këshillohen të përdorin itinerare alternative për të vijuar lëvizjen drejt juglindjes së vendit. Për autoveturat rekomandohen dy akse: Maliq–Lozhan–Strelc–Gramsh–Elbasan, si dhe Qafë Thanë–Pogradec–Korçë–Leskovik–Përmet–Tepelenë.
Ndërkohë, për mjetet e tonazhit të rëndë, ARRSH sugjeron devijimin përmes Pikës Doganore Qafë Thanë drejt Maqedonisë së Veriut, më pas nga Pika Doganore e Bllatës dhe vijimin në Rrugën e Arbërit, si alternativa më e përshtatshme për përballimin e fluksit dhe garantimin e sigurisë rrugore.
Autoriteti Rrugor Shqiptar apelon drejtuesit e mjeteve dhe banorët e zonës që të respektojnë sinjalistikën dhe udhëzimet e Policisë Rrugore deri në stabilizimin e plotë të situatës.
(Burimi: ARRSH)
